Għal darba oħra ħareġ ċar kif l-Ewroparlamentari tal-Partit Nazzjonalista Roberta Metsola qabżet għal sħabha l-Konservattivi fl-Unjoni Ewropea.
Din id-darba, Roberta Metsola qed taqbeż għall-Gvern tal-Islovenja mmexxi minn Janez Janša, li huwa parti mill-Partit Popolari Ewropew, li fih hemm imsieħeb il-Partit Nazzjonalista.
Il-Gvern ta’ Jansa ħa f’idejh il-Presidenza tal-Kunsill Ewropew mill-bidu ta’ Lulju, hekk kif spiċċa t-terminu ta’ sitt xhur tal-Portugall.
Bħalissa fl-Unjoni Ewropea hemm kritika ħarxa fuq din il-Presidenza tal-Islovenja, hekk kif fl-aħħar xhur, il-Kummissjoni Ewropea akkużat lill-Gvern ta’ Jansa li qed jimmina lill-ġurnalisti u s-saltna tad-dritt.
L-aġir tal-Ewroparlamentari tal-Partit Nazzjonalista u sħabha l-Konservattivi ġie nnutat mis-sit awtorevoli Politico.
Ir-rapport tal-Politico jgħid kif il-Konservattivi fl-Unjoni Ewropea jinsabu taħt pressjoni minħabba li qed jieħdu pożizzjoni fjakka fuq il-Prim Ministru Sloven, Janez Janša.
Hawnhekk il-Politico semmew lil Roberta Metsola, li ntqal kif żammet ton differenti meta tkellmet dwar l-Islovenja.
Il-Politico qalet kif l-uffiċjali tal-Partit Popolari Ewropew qed jgħidu li Janša mhux qed isir bħall-Prim Ministru Ungeriż Viktor Orbán.
F’April tas-sena l-oħra, l-Ewroparlamentari Nazzjonalisti Roberta Metsola u David Casa ma ffirmawx ittra formali ta’ pressjoni sabiex il-Partit tal-Fidesz immexxi mill-Prim Ministru Ungeriż Viktor Orbán jitkeċċa mill-Partit Popolari Ewropew.
Din l-ittra waslet wara li kien hemm nuqqasijiet serji min-naħa tal-Ungerija fiż-żamma tas-saltna tad-dritt u t-tħaddin tad-demokrazija.
Il-partit ta’ Orbán fl-aħħar mill-aħħar ma tkeċċiex mill-Partit Popolari Ewropew, iżda telaq minn jeddu.
Barra l-Ungerija, Roberta Metsola qabżet ukoll għal sħabha l-Konservattivi, hekk kif hija qabżet ukoll għal gvern Bulgaru ta’ Boyko Borisov.
Fil-Bulgarija, diversi persuni ħarġu jipprotestaw kontra l-Gvern ta’ Borisov, b’Metsola ressqet riżoluzzjoni fuq il-Bulgarija.
Hija ppruvat tgħaddi emendi meqjusa bħala skandalużi, li bihom titfa’ dell ikrah fuq id-dimostranti u tiddefendi l-Gvern ta’ Borissov.
Ftit tax-xhur ilu, ONE News mar il-Bulgarija u tkellem ma’ żewġ attivisti Bulgari dwar dan, fejn huma esprimew ir-rabja tagħhom lejha u lejn dak li għamlet.
