Iffaċċjata mill-midja, Roberta Metsola l-ewwel tfixklet, wara ħarbet, għax kienet skomda għall-aħħar, u mbagħad spiċċaw biex jimblokkawna n-nies li kienu qed jakkumpanjawha.
Fl-Università, wara taħdita tal-Fakultà tal-Liġi, li għaliha l-tħassru l-lezzjonijiet u l-istudenti kienu obbligati jattendu, ipprovajna nistaqsu lil Roberta Metsola mistoqsijiet pertinenti dwar il-Partit Nazzjonalista, li baqa’ ma ressaqx il-kontijiet finanzjarji u r-rapport tad-donazzjonijiet, kif inhu obbligat, skont il-Liġi tal-Finanzjament tal-Partiti.
Saħansitra l-Partit Nazzjonalista għal sentejn sħaħ injora ħames twissijiet li sarulu mill-Kummissjoni Elettorali.
Fuq dawn il-fatti, staqsejna lil Metsola, ukoll bħala Ewro-Parlamentari tal-Partit Nazzjonalista, imma din mill-ewwel dehret skomda, tant li tfixklet.
ĠURNALIST: “Sinjura President. Mistoqsija…”
ROBERTA METSOLA: “Kont ġewwa kont ġewwa.”
ĠURNALIST: “Il-Partit Nazzjonalista qed jikser il-liġi tal-finanzjament tal-partiti. Kellu twissijiet. X’inhi l-pożizzjoni tiegħek? Kuntenta li l-partit tiegħek qed jikser il-liġi?”
ROBERTA METSOLA: “Jiena qatt ma jien kuntenta meta l-allegazzjonijiet…”
ĠURNALIST: “Il-Partit Nazzjonalista mhux allegazzjoni il-Partit Nazzjonalista kellu ħames twissijiet.”
ROBERTA METSOLA: “F’din id-diskussjoni u fuq hekk se tkellimni?”
ĠURNALIST: “Fuq il-Partit Nazzjonalista qed nistaqsik, kellu ħames twissijiet fi żmien sentejn mill-Kummissjoni Elettorali. Inti Ewroparlamentari Nazzjonalista.”
ROBERTA METSOLA: “Ewroparlamentari u jiena kuntenta ħafna wkoll.”
ĠURNALIST: “Il-pożizzjoni però fuq dan il-ksur tal-liġi.”
ROBERTA METSOLA: “U l-Għawdxin kollha u fuq dak kollu nitkellmu fuq l-istat tad-dritt. Qed nitkellmu fuq il-protezzjoni tal-ġurnalisti. Qed nitkellmu fuq dak kollu li għandu jkun.”
ĠURNALIST: “Fuq il-Partit Nazzjonalista m’intix tweġibni.”
ROBERTA METSOLA: “Jekk irid ikun hemm diskussjoni, iva, dwar kif nistgħu ntejbu l-pożizzjoni tal-partiti politiċi kollha, nagħmluha.”
Bl-eks Viċi Kap Nazzjonalista Tonio Borg warajha u mdawra b’għadd ta’ kandidati Nazzjonalisti, li ġew magħha għat-taħdita, li kellha tkun akkademika u mhux politika, Roberta Metsola tant kienet skomda twieġeb lill-midja li spiċċat ħarbet biex ukoll nistaqsuha dwar il-Parlament Ewropew.
Mhux biss ħarbet, imma mbagħad imblokkawna biex Metsola tkun tista’ taħrab u ma tweġibx.
Metsola mhux l-ewwel darba li ħarbet minn fuq il-post quddiem skumdità.
Inċidentalment f’istituzzjoni edukattiva oħra, fl-MCAST, spiċċat ħarbet mill-garaxx taħt l-art wara li ġiet iffaċċjata mill-ġurnalisti u bi protesta minn studenti li kkritikawha għall-pożizzjonijiet żbilanċjati tagħha fuq il-Lvant Nofsani.
Dwar l-attività fl-Università tal-Ġimgħa, aktar kmieni ONE News żvela kif biex is-sala tkun mimlija quddiem Metsola, il-Fakultà tal-Liġi obbligat lill-istudenti tagħha biex imorru ta’ bilfors.
Permezz ta’ korrispondenza mibgħuta l-Ħamis, intqal lill-istudenti li din il-lecture tal-kandidat tal-Partit Nazzjonalista u President tal-Parlament Ewropew il-Ġimgħa hi “mandatorja”.
Din kienet imejl li ntbagħtet bħala tfakkira u saħansitra bħala mezz ta’ pressjoni, wara li kienet diġà ntbagħtet oħra fil-jiem ta’ qabel.
Iżda, hekk kif bħal donnu dan ma kienx biżżejjed, ftit wara, intbagħtet imejl oħra u ntqal lill-istudenti li l-fakultà waqqfet l-attivitajiet kollha li kienu skedati għall-ġurnata.
Fil-fatt tħassru l-lectures ta’ dak il-ħin biex l-istudenti jkunu obbligati jmorru għal din it-taħdita ta’ Metsola.
ONE News hu informat li dawn id-deċiżjonijiet ittieħdu wara li l-uffiċċju ta’ Metsola u l-Fakultà tal-Liġi kienu f’komunikat regolari bejniethom u l-uffiċċju ta’ Metsola beda jagħmel pressjoni li ma riedx jara sala vojta.
