F’kitba egoċentrika ta’ min jaħseb li jaf l-aħjar, Roberta Metsola ddeskriviet lilha nnifisha bħala xi simbolu nazzjonali għal pajjiżna u kulħadd għandu jkun kburi li għandu lilha tirrappreżentah madwar id-dinja.
F’artiklu fit-Times tal-Ħadd, Metsola tkellmet dwar il-pożizzjoni tagħha bħala l-President tal-Parlament Ewropew fl-aħħar sentejn u tenniet li għandna nkunu kburin li hi kienet l-ewwel Maltija li laħqet f’dan il-livell. Qalet li dan “jippermetti li l-bandiera Maltija tittajjar bi kburija kull fejn tmur”.
Bl-istess mod, fl-aħħar jiem il-kandidata Nazzjonalista xtrat magażin tat-Times biex tgħid li hi “l-unika tama għal Malta” lejliet l-elezzjonijiet tat-8 ta’ Ġunju li ġej.
Dan anke jekk baqgħet tevita kull dibattitu ma’ kandidati oħrajn biex l-elettorat ikun jista’ jiġġudika aħjar.
Ironikament, fl-artiklu tagħha fit-Times, Metsola attakkat lill-Prim Ministru Robert Abela, għax ikun f’“daru”, b’deskrizzjoni għall-istazzjon ONE, fejn ġie intervistat bl-istess mod li, kontinwament, iwieġeb għall-mistoqsijiet tal-ġurnalisti minn kull mezz tal-midja.
Xi ħaġa li hi stess taħrab kontinwament, għajr fejn tħossha komda li mhux se jagħmlulha dawk il-mistoqsijiet pertinenti li faċilment iħammrulha wiċċha.
F’waħda mill-okkażjonijiet rari, ONE News sabha fir-Rabat fejn staqsiha mistoqsijiet diretti kemm dwar ir-raġunijiet għalxiex qed taħrab id-dibattiti kif ukoll dwar iż-żjara tagħha f’Iżrael, li ppreċediet il-ġenoċidju f’Gaza.
Skomda għall-aħħar, spiċċat tgħid li qed tiddibatti hemmhekk mal-ġurnalist ta’ ONE News u dwar iż-żjara f’Iżrael, li wasslet għall-akkużi internazzjonali li għandha d-demm tal-innoċenti fuq idejha, saħansitra qalet li hi marret Iżrael biex issalva l-ħajjiet.
Iżda kien ċar fl-artiklu tat-Times, fejn ukoll indikat li kienet maħruqa, għax spiċċat fuq billboard bl-uċuh ewlenin tal-establishment Nazzjonalista, Metsola qed tħoss ir-rabja popolari wara li fl-aħħar ħames snin, flimkien ma’ seħibha David Casa, ħadmet kontra l-interessi ta’ pajjiżna.
