Chayenne Abela, li għandha erbatax-il sena, ġiet ippremjata bil-Premju Ġwanni Tlieta u Għoxrin għat-Tjubija.
Chayenne, li tattendi l-iskola sekondarja tal-Kulleġġ San Ġorġ Preca fil-Ħamrun, hija ta’ għajnuna kbira għall-ħabiba tagħha Szintia Ladocki, li ssibha diffiċli sabiex tikkomunika ma’ persuni li m’għandhiex kunfidenza magħhom jew li ma tafhomx.
Grazzi għal Chayenne, Szintia tista’ tipparteċipa fil-lezzjonijiet u tikkomunika l-bżonnijiet tagħha mal-għalliema.
“Dak il-ħin ma tantx tinduna, inti, għax tkun qisu istint li, meta xi ħadd ikun fil-bżonn, tgħinnu.”
Lil Chayenne innominaha l-għalliem tagħha Edward Azzopardi, li spjega kif Chayenne illum il-ġurnata saret qisha vuċi għal Szintia – iżda mhux biss.
“Sodisfatt ħafna, ovvjament, jixirqilha. Barra lil Szintia, hi tgħin anki studenti oħrajn, għalkemm mhux daqshekk b’mod viżibbli, u nista’ ngħid li daqshekk essenzjali però dawn l-affarijiet żgħar, li forsi għalina ma jfissru xejn, għal min jirċivihom ifissru ħafna.”
Dan il-premju, imsejjes fuq il-valuri tal-Papa t-Twajjeb, ilu jirrikonoxxi atti ta’ tjubija għal dawn l-aħħar sitta u ħamsin sena u jiġi organizzat mil-Laboratorju tal-Paċi.
Il-Fundatur ta’ dan il-Laboratorju, Patri Dijonisju Mintoff, saħaq li t-tjubija titnissel fuq il-bankijiet tal-iskola għax teduka liż-żgħażagħ dwar il-fraternità.
“L-edukazzjoni trid taħseb għal-lum u għada. Qed taħseb għat-tfal mhux biex joqogħdu għomorhom kollu fl-iskola. Qed taħseb għat-tfal biex joqogħdu ftit żmien fl-iskola imma mbagħad joħorġu fil-ħajja u fil-ħajja jridu jgħixu l-ħajja ta’ kuljum; il-ħajja ta’ kuljum, bil-konflitti tagħha, bl-inkwiet tagħha, bis-sabiħ tagħha, bix-xitwa, bis-sajf tagħha. Irid jgħaddi minn dan kollu l-bniedem.”
Preżenti għaċ-ċerimonja, li saret fil-Palazz ta’ Sant Anton, kien hemm ukoll il-President ta’ Malta, George Vella, li tkellem dwar kif dan ir-rikonoxximent jippremja ġesti żgħar li jfissru d-dinja.
Qal li r-rabta li hemm bejn Chayenne u Szintia tfakkarna f’kemm l-empatija kapaċi tgħinna negħlbu diffikultajiet li nħabbtu wiċċna magħhom.
