Il-Maltin fuq Twitter li jsegwu mill-qrib il-Familja Rjali Ingliża kellhom sorpriża ħelwa, grazzi għal ritratt rari li tfaċċa fuq il-paġna tar-rivista Majesty, li juri lid-Dukessa ta’ Sussex Meghan Markle liebsa għonnella tradizzjonali Maltija.
Jidher li r-ritratt imur lura għall-2015, meta Markle żaret Malta biex issir taf aktar dwar il-familja tagħha. Hawnhekk iltaqgħet mal-Markiż de Piro, u martu Frances f’ Casa Rocca Piccola, il-Belt Valletta.
Ir-rabta tad-Dukessa ma’ Malta tmur lura sal-1862, hekk kif bużnannitha twieled il-Belt Valletta. Meta żaret pajjiżna tliet snin ilu, Markle qalet li l-mawra tagħha fil-Gżejjer tagħna għinitha tifhem l-identità tagħha aktar. Fuq kollox, qalet li ħassitha milqugħa f’pajjiżna, u l-ospitalità li kapaċi joffri pajjiżna huwa tassew speċjali.
