Ħasbitu ferħ ta’ qattus iżda wara kumment fuq is-sit soċjali facebook ntebħet li kien propju ġurdien.
Kienet Yanica Galea, ta’ 25 sena li kkumentat fuq post ta’ mara li bdiet isaqsi jekk xi ħadd setgħax jieħu lil dan il-ferħ, iżda wara li din il-mara skopriet li l-istess ferħ kien ta’ ġurdien, iddeċidiet li tpoġġih lura fejn sabitu.
Iżda Yanica, ma felħitx tara lil dan il-ġurdien abbandunat bla ommu u bla tama li jgħix. Minħabba li din it-tfajla tuża s-siġġu tar-roti, kien diffiċli għaliha biex tmur fuq il-post u tiġbor lil dan il-ġurdien. Kien wara post fuq is-sit soċjali facebook, li wasslu żewġ ġuvintur biex jiġbru dan il-ġurdien u jtuh lil din it-tfajla.
L-istat ta’ dan il-ġurdien kien ħażin ħafna, hija ddeskriviet kif kienet kważi tilfet ħajjitha u li kienet kiesħa silġ. Iżda dan kien bidu ġdid għal din il-kreatura, din it-tfajla għamlet minn kollox biex issalva lil dan il-ferħ li semmiet Halo.
Din it-tfajla saħansitra ħadet lil dan il-ġurdien għand il-veterinarju.
