Il-Merill SICAV plc, li hi liċenzjata f’Malta, riċentament ingħatat l-approvazzjoni mill-Awtorità għas-Servizzi Finanzjarji ta’ Malta biex is-sottofondi tagħha jiġu kklassifikati taħt l-Artiklu 8 tal-SFDR.
B’hekk saret l-ewwel SICAV f’Malta b’erba’ sottofondi liċenzjati skont l-Artiklu 8, li jikkunsidra l-impatti negattivi tas-sostenibbiltà fil-proċess ta’ investiment.
Is-sostenibbiltà qed issir ċentrali fl-investimenti globali u l-fondi tal-Artiklu 8 qed isiru essenzjali, li jippromwovu karatteristiċi ambjentali u soċjali, u jallineaw mal-għanijiet ta’ żvilupp sostenibbli tal-Ġnus Magħquda, filwaqt li jimbottaw il-profittabilità.
Mill-21 ta’ Novembru 2024, il-kollezzjoni tal-fondi Merill, inklużi l-Merill Total Return Income Fund, il-Merill High Income Fund, il-Merill Strategic Balanced Fund u l-Merill Global Equity Income Fund, ġew ikkonvertiti għal fondi tal-Artiklu 8. L-assi mħaddmin mill-Merill SICAV plc issa qabżu l-€165 miljun.
L-investituri li jagħżlu fondi tal-Artiklu 8 mhux biss ikollhom potenzjal ta’ dħul finanzjarju, iżda wkoll jikkontribwixxu għas-sostenibbiltà. Is-sottofondi tal-Merill se joffru trasparenza akbar, b’ħarsa ċara lejn l-impatti ambjentali u soċjali tagħhom u kif jintlaħqu dawn l-għanijiet.
Dr Mark Azzopardi, Chairman tal-Kumitat tal-Investiment tal-Merill SICAV plc, qal li l-klassifikazzjoni tal-fondi taħt l-Artiklu 8 timmarka impenn sinifikanti għal bilanċ bejn it-tkabbir finanzjarju u l-promozzjoni tas-sostenibbiltà, bil-għan li jiġu evitati investimenti li jistgħu jkollhom impatti negattivi fuq is-saħħa u l-benesseri tal-bniedem.
