Bi pjaċir is-Soċjeta’ Mużikali Santa Katarina V.M. tippreżenta re-enactment li jfakkar il-ġurnata meta Ferdinand Von Hopesch, Gran Mastru ta’ l-Ordni ta’ San Ġwann għamel żjara storika fiż-Żurrieq.
Ingħaqad magħna ġewwa ż-Żurrieq nhar il-Ħadd 20 ta’ Mejju mid-9.00 ta’ filgħodu sa nofs inhar fejn flimkien immorru lura fiż-żmien u ngħixu dawk il-mumenti importanti fl-istorja ta’ raħalna bi spettaklu uniku ta’ parati differenti, ġlied bix-xwabel, sparar ta’ armi tan-nar, żfin tradizzjonali bi ħwejjeġ tan-nobbli, għana, esebizzjoni ta’ tjur minn Sharp Sight Falconry kif ukoll wirja ta’ snajja tradizzjonali. Ma jistax jonqos ssib ukoll ikel bnin u nbid Malti.
Grupp ta’ persuni miż-Żurrieq ser jingħaqdu ma tim professjonali mill-grupp tal-In Guardia taħt il-patroċinju tal-Awtorita’ Maltija tat-Turiżmu. Din l-attivita’ser tkun organizzata mis-Soċjeta’ Mużikali Santa Katarina V.M. fl-okkażjoni tal-200 sena mil-wasla tal-vara titular ta’ Santa Katarina fil-Parroċċa taż-Żurrieq (1818-2018).
Dħul huwa b’xejn.
