Matul l-elfejn tlieta u għoxrin, l-aġenzija Project Green diġà tat lill-poplu mal-erbgħin tomna art, jew l-ekwivalenti ta’ sitt grawnds tal-futbol, fi spazji ħodor madwar il-pajjiż kollu.
Dawn fl-ewwel ħdax-il xahar minn mindu twieldet, din l-entità daħlet f’ħidma sfieqa biex timplimenta bosta proġetti ambjentali bl-allokazzjoni governattiva ta’ seba’ mitt miljun ewro.
Matul din is-sena wkoll, din l-aġenzija issottomettiet il-pjani lill-Awtorità tal-Ippjanar, wara konsultazzjoni mar-residenti, biex issir it-trasformazzjoni tal-qalba ta’ San Ġwann, b’ġonna u żoni ta’ rikreazzjoni jieħdu post triq arterjali traffikuża.
Ġie mħabbar ukoll spazju miftuħ ta’ madwar 3,000 metru kwadru, li se jiġi rritornat lill-komunità ta’ Bormla biex isir pulmun ta’ siġar u pjanti f’din il-lokalità. Din l-art, li kienet se tiġi żviluppata f’dormitorju mill-American University of Malta u li preżentament qed tintuża bħala parkeġġ, se tingħata lura lin-nies fi spazju miftuħ pubbliku aċċessibli għal kulħadd.
Ġew mħabbra wkoll sittax-il proġett ambjentali ġdid li se jkunu qed isiru madwar pajjiżna sal-elfejn ħamsa u għoxrin, b’investiment ta’ għaxar miljun ewro.
Fost l-akbar proġetti li ġew miftuħa matul din is-sena kien hemm il-Park tal-Familja f’Bengħajsa, spazju miftuħ ta’ sbatax-il elf metru kwadru, fejn il-familji jistgħu jirrikreaw irwieħhom qalb 4,000 siġra.
Infetħet ukoll l-ewwel korsa tal-ostakli pubblika fil-Park ta’ San Klement f’Ħaż-Żabbar. Il-korsa hi mifruxa fuq elfejn u seba’ mitt metru kwadru u tipprovdi lill-atelti u l-isportivi bl-opportunità li jipprattikaw id-dixxiplina favorita tagħhom f’park pubbliku.
Dwar dan tkellimna mal-Kap Eżekuttiv ta’ Project Green, Steve Ellul, li semma kif il-proġetti qed isiru bi ħsieb u b’karatteristiċi uniċi li jattiraw etajjiet differenti.
Qal, “Fil-Mosta rriġenerajna spazju apposta biex l-istudenti jkunu jistgħu igawduh. F’Ħaż-Żabbar għamilna l-ewwel OCR facility f’pajjiżna miftuħa għall-pubbliku biex naraw aktar żgħażagħ u sportivi jgawdu dawn l-ispazji miftuħa. F’Marsaskala rajna li jkollna l-ewwel toddler area, apposta għaż-żgħar, biex anke huma jkunu jistgħu jgawdu dawn l-ispazji mal-ġenituri tagħhom.”
Staqsejnih ukoll dwar ix-xogħol li mistennija tvara u tlesti l-aġenzija minn issa ’l quddiem. Ellul sostna li t-tlestija ta’ aktar proġetti hi essenzjali biex tkompli tiżdied il-fiduċja fl-effiċjenza ta’ din l-aġenzija.
Hawn tenna li, ftit tax-xhur ilu, tħabbar li l-Gvern irnexxielu jġib aktar tmien miljun ewro u fuqhom f’fondi Ewropej biex jittellqu proġetti ħodor kbar f’pajjiżna.
Hu ta ħjiel ta’ x’nistgħu nistennew fis-sena li ġejja.
Stqarr, “Proġetti kbar ukoll fil-Fgura, anke hawnhekk stess f’Bengħajsa, ħa jkollna estensjoni ta’ park, fi Ġnien Kottoner ħa nagħmlu riġenerazzjoni sħiħa, proprju bejn il-Fgura u l-Kottonera se jkollna aktar minn mitt elf metru kwadru ta’ spazju miftuħ ġdid. Ħa nkunu qed naraw li hemmhekk ikollna spazju daqs darbtejn f’Ta’ Qali ġewwa l-Fgura u l-Kottonera.”
Steve Ellul temm jgħid li bħalissa għaddejin id-diskussjonijiet mal-Awtorità tal-Artijiet biex jiġu identifikati żoni fil-qalba tal-irħula ħalli jiġu ppriservati, b’investiment ta’ aktar minn għoxrin miljun ewro.
Ix-xahar li għadda, il-gazzetta KullĦadd ħabbret li diġà ġew identifikati mill-inqas seba’ żoni għal dan il-għan.
Waqt li dawn ivarjaw fid-daqsijiet, jirriżulta li, komplessivament, jaqbżu l-ħmistax-il elf metru kwadru li se jinbidlu fi spazji ġodda miftuħa, minflok jinbnew anke jekk jinsabu f’żoni li jistgħu jiġu żviluppati b’dan il-mod.
