Matul l-2023, Malta għandha pjan biex tiddekarbonizza s-setturi li qed jikkawżaw l-aktar emissjonijiet.
Dan intqal mill-Ambaxxatriċi ta’ Malta għat-Tibdil fil-Klima, il-Professur Simone Borg, f’kumment ma’ One News meta tkellmet dwar il-miżuri ewlenin li se jieħu pajjiżna matul l-elfejn tlieta u għoxrin biex jindirizza t-tibdil fil-klima.
Il-Professur Borg stqarret, “Aħna għandna dan il-pjan biex niddekarbonizzaw bħala pajjiż. Se niddekarbonizzaw l-aktar setturi li qed jikkawżaw emissjonijiet, trasport, ġenerazzjoni tal-enerġija, power stations, jiġifieri se nkomplu naqilbu t-taħlita tal-enerġija għal waħda ta’ aktar enerġija rinnovabbli.”
L-Ambaxxatriċi Borg tkellmet ukoll dwar kif wieħed mis-summits ewlenin li saru matul l-elfejn tnejn u għoxrin kien dak li seħħ lejn l-aħħar ta’ Novembru f’Sharm El-Sheikh, fl-Eġittu, li indirizza t-tibdil fil-klima.
L-għan ta dan is-summit kien li jissaħħaħ ir-rispons globali biex jintlaħqu l-għanijiet tal-ftehim milħuq fil-konferenza ta’ Pariġi seba’ snin ilu. Ċentrali fil-ftehim tal-COP15 f’Pariġi kien li ż-żieda fit-temperatura globali tkun ta’ inqas minn żewġ gradi Celsius.
Il-COP27 ta’ Novembru wassal għal qbil “storiku” biex jiġu allokati fondi lil dawk il-pajjiżi meqjusa bħala foqra u li huma milquta mit-tibdil fil-klima.
Dan il-qbil ġab miegħu diversi reazzjonijiet, fosthom tas-Segretarju Ġenerali tan-Nazzjonijiet Uniti, António Guterres, li wera ruħu ddiżappuntat b’dak li l-kapijiet ta’ Gvern kisbu fl-Eġittu matul l-aħħar konferenza annwali tan-Nazzjonijiet Uniti.
Guterres qal li d-dinja għadha qed tilgħab man-nar b’dak li għaddejja minnu minħabba t-tibdil fil-klima. Sostna li l-COP27 ma spjegax b’mod konkret kif għandhom jonqsu l-emissjonijiet mill-aktar fis, fost l-oħrajn.
Fi tmiem il-konferenza, kliem iebes anki mill-Viċi President tal-Kummissjoni Ewropea, Frans Timmermans, li qal li fil-fehma tiegħu kellu jsir sforz akbar fil-konferenza.
L-Ambaxxatriċi Maltija għat-Tibdil fil-Klima, Simone Borg, qalet li għalkemm kien hemm diversi pajjiżi li sabuha diffiċli biex jagħtu fondi lil dawk il-pajjiżi li huma meqjusa bħala foqra, Malta rnexxielha tirdoppja dan il-fond.
Hi qalet, “Il-commitment tagħna, li minkejja li, ovvjament, il-pandemija kellha effett ekonomiku fuq pajjiżna, konna xorta lesti nirduppjaw il-kontribut tagħna għal darba oħra. Hemmhekk tajna lezzjoni lil ħafna pajjiżi.”
Meta indirizza din il-konferenza, il-Prim Ministru Robert Abela saħaq li jridu jiġu implimentati miżuri li tassew jindirizzaw it-tibdil fil-klima.
Fl-intervent tiegħu, il-Prim Ministru Abela qal li dan irid isir billi tiddaħħal politika fiskali li tinċentiva l-investiment fl-ekonomija diġitali u tinbena politika b’saħħitha favur l-użu ta’ enerġija alternattiva.
Min-naħa tagħha, l-ambaxxatriċi Simone Borg qalet li l-messaġġ tal-Prim Ministru Malti kien wieħed ċar li wera li pajjiżna qed jagħti importanza t-tibdil fil-klima.
Hi stqarret, “Ħareġ messaġġ ċar ta’ solidarjetà, speċjalment mal-istati gżejjer iż-żgħar, fejn il-Prim Ministru reġa’ semma l-inizjattiva tagħna biex ngħinu lill-istati gżejjer iż-żgħar anke jitħarrġu u jistudjaw f’Malta, u hekk qed nitgħallmu aħna.”
