Għad għandu biss erba’ xhur u nofs, u jinsab għall-kura fl-Ingilterra minħabba marda rari – dik li meta jorqod jinsa’ jieħu n-nifs.
Dan huwa iċ-ċkejken Mason, li l-kundizzjoni tiegħu hi unika f’pajjiżna.
Daniela, omm Mason, spjegat kif minnufih mat-twelid irrealizzaw li xi ħaġa ma kinitx f’postha, biex ftit biss wara sabu ruħhom fl-Isptar ta’ Great Ormond Street, f’Londra, u li ħajjithom kienet se tinqaleb ta’ taħt fuq.
It tifel ġie blu beda jiġġieled għal ħajtu għax kull darba li jorqod jinsa jieħu n-nifs. Ħafna iebsa jkollok kollox lest, id dar qatt ma hadtu.
Malcolm- missier Mason jirrakkonta, kif għall-kuntrarju ta’ missirijiet oħra, fejn ftit wara l-ħlas, jilqgħu lit-tarbija tagħhom fi ħdanhom, huwa ma setax jgħix dik l-istess esperjenza emozjonanti:
Indunajt li ġara xi ħaġa ħażina għax qaluli jekk ikun hemm kollox sew wara kwarta intuk il-baby f’idek- wara kwarta ma wasalx il-baby f’idi.
Sabiex ikun jista’ jgħix, Mason għandu bzonn l-għajnuna ta’ magni speċjalizzati- liema apparat jinsab fl-Ingilterra. Minkejja li dan l-apparat qiegħed jagħti l-ħajja lil din it-tarbija, b’sens ta’ dieqa Daniela tistqarr, li ma tistax tħoss is-sensazzjoni li tħoss omm meta żżomm lit-tarbija tagħha:
Dik li ibni jorqod fuqi- irrid inqabbad din il-magna- tifred il-bonding ta’ bejnietna.
Permezz tal-Fondazzjoni Puttinu Cares, kemm Mason kif ukoll il-ġenituri tiegħu qed jingħataw l-għajnuna li hemm bżonn- dan hekk kif jidher li t-tifel għandu bżonn jibqa’ jingħata l-kura medika fl-Ingilterra għal tmien snin.
Kif jispjega Charlie, n-nannu ta’ Mason, dawn is-snin kollha li ser iqattgħu Daniela u Malcolm flimkien ma’ binhom fl-Ingilterra iġibu magħhom sens ta’ nuqqas mill-membri familjari u swied il-qalb:
Meta jiġu tnejn bniet tal ieħor u t-tielet wieħed ma jiġix- tħossha ħafna u tarah hemm tħossha
Minkejja li t-telgħa tal-kalvarju tidher li hija waħda twila u iebsa, Daniela xorta waħda għadha tittama li xi darba binha Mason ifieq:
Fil-fond ta’ qalbi jibqali xorta li xi darba jfieq kompletament naf li impossibli imma xorta għadni nitlob li jfieq kompletament. Nixtieq li xi darba ma jkollux bżonn din il-magna imma jkun jista’ jorqod normali.
Fl-okkazjoni ta’ festi marbutin mal-Għid il-kbir, Puttinu Cares se tiġbor il-fondi sabiex tkompli tkun ta’ sostenn għall-familji Maltin u Għawdxin li mhux biss ikunu qed jesperjenzaw mard kiefer, imma li jkollhom iħallu kollox, jitilqu min art twelidhom bil-għan li jiksbu l-fejqan.
