Mas-sebat elef impjegat fis-servizz pubbliku bbenefikaw minn miżuri ‘family-friendly’ fl-elfejn u sittax.
Dan irriżulta minn statistika li ppreżenta s-segretarju permanenti ewlieni, Mario Cutajar waqt li tul il-jum tal-Erbgħa sar kallokju għall-unjins, maħsub biex jiddiskuti ir-relazzjonijiet bejn l-industrija u min iħaddem fi ħdan is-settur pubbliku.
Mit-total ta’ impjegati li bbenefikaw minn miżuri ta’ bilanċ bejn ix-xogħol u l-familja, tmenin fil-mija kienu nisa.
Dan ifisser li ħamest elef ħames mija u tmienja kienu lkoll femminili u elf tliet mija u sitta u erbgħin kienu rġiel.
L-aktar miżura utilizzata hija dik tat-teleworking hekk kif b’kollox, elf mija u tmienja u ħamsin mara u raġel ibbenifikaw minnha.
Huwa ħabbar li se jsir proġett pilota sabiex ikun evalwat l-effett li jħallu l-estensjoni fis-sigħat fis-servizz lejn il-pubbliku:
proġett pilota li ġa qed nidentifikaw dipartiment jew dipartimenti li permezz tagħhom se jkollna flessibiltà aktar fejn jidħlu ħinijiet tax-xogħol u allura nilħqu żewġ għanijiet, l-ewwel nett li nkunu qed nagħtu aktar opportunità ta’ flessibiltà fuq il-ħin tax-xogħol anke għall-ħaddiema nfushom u allura nilħqu bilanċi ġodda fejn jidħol bilanċ bejn il-familja u x-xogħol u nkunu qed inwessgħu s-servizz għall-klijenti li nkunu qegħdin nagħtu
Is-segretarju permanenti ewlieni qal ukoll li mhemm l-ebda ħsieb biex jitwaqqfu n-nofstanhari u li wisq anqas mhemm indikazzjoni li n-nofstanhari qed iħallu impatt fuq l-ekonomija.
Huwa fisser kif mill-elfejn u tlettax ‘il hawn ġew konklużi erbgħa u erbgħin ftehim fis-servizz pubbliku u tlieta u tletin oħra fis-settur pubbliku.
Dan fl-istess waqt li hemm dsatax-il ftehim settorali minn total ta’ sebgħin fis-servizz pubbliku li għadhom qed jiġu diskussi u tnejn u tletin oħra minn total ta’ sittom fis-settur pubbliku.
Mario Cutajar żied ifakkar dak li żvela f’laqgħa li kellu il-ġimgħa li għaddiet, mal-Kumitat għar-Riżorsi Umani fi ħdan il-Kamra tal-Kummerċ; jiġifieri li r-riżultati tal-istħarriġ jikkontradixxu dak li qalet il-Malta Employers Association f’Settembru li għadda, li l-ħaddiema fis-settur pubbliku jieħdu t-tripplu tas-sick leave li jieħdu l-ħaddiema fis-settur privat.
