Marsaxlokk sfaw miżmuma fi draw diżappuntanti ta’ 1-1 minn Sirens, biex b’hekk tilfu żewġ punti prezzjużi fit-tentattiv tagħhom li jiksbu post fl-Ewropa fi tmiem l-istaġun.
Ix-Xlukkajri kienu indubbjament l-aħjar team fl-ewwel taqsima iżda fit-tieni taqsima Sirens wettqu reazzjoni mill-aqwa u għarfu jikkonrollaw tajjeb lill-avversarji tagħhom u kienu huma l-aħjar team fil-ground.
Kien fil-11-il minuta li waslet l-ewwel azzjoni denja ta’ nota b’Marsaxlokk jkunu huma li joħolqu l-periklu meta Junior Jose Fernando Gomes għadda tajjeb lejn Yuri De Jesus Messias li minn pożizzjoni ideali tefa’ għoli. Huma komplew jippressaw u fetħu l-iskor fit-23 minuta permezz ta’ freekick pinġut tal-captain Leandro Aguirre li ma ta l-ebda ċans lill-goalkeeper u captain ta’ Sirens, Andrea Cassar.
Sirens wieġbu żewġ munuti biss wara permezz ta’ xutt mid-distanza ta’ Nicholas Pulis ġie salvat b’diffikulta mill-goalkeeper Serb tax-Xlukkajri, Marko Drobnjak.
Iżda kienu Marsaxlokk li resqu viċin li jirduppjaw l-iskor fis-37 minuta meta Sunday Akinbule dar tajjeb ma’ difensur avversarju, qabel spara xutt minn ġol-kaxxa li stampa mal-wieqfa, b’Sirens jeħilsuha ħafif.
Fil-ftuħ tat-tieni taqsima, Marsaxlokk, komplew fejn ħallew fl-ewwel waħda, u fil-50 minuta, Duane Bonnici indirizza cross li sab lil Sunday Akinbule li bir-ras niżżel il-ballun lejn Yuri De Jesus Messias li kellu x-xutt bid-dawra tiegħu jimpenja sew lil Andrea Cassar.
Iżda Sirens ġabu l-iskor indaqs fil-55 minuta meta Degran Jackson spara xutt mid-distanza li ma ta l-ebda ċans lil Drobnjak, biex irriżulta goal tal-istampi.
Huma komplew jiddettaw il-logħob u kwarta wara, xutt ta’ Bismark Asare ġie mdawwar f’corner bi bravura minn Drobnjak.
Kulma jmur kompla d-dominju assolut tat-team minn San Pawl il-Baħar u fis-77 minuta, l-awtur tal-uniku goal għalihom, Degran Jackson dar tajjeb ma’ difensur avversarju qabel venven xutt fil-baxx minn qagħda ideali li ġie salvat minn Drobnja, wara li ntefa’ minn tulu fl-art.
Marsaxlokk wieġbu minuta biss wara u kienu sfortunati li ma skorjawx il-goal tar-reħha meta Sunday Akinbule kellu t-tetatativ tiegħu minn daqqa ta’ ras mill-viċin jaħbat mal-mimduda u jintemm barra.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Philip Farrugia
BOV Plejer tal-Logħba: Degran Jackson
