F’partita pjaċevoli, Marsaxlokk rebħu 2-1 kontra Balzan, biex b’hekk komplew ikabbru l-problemi għal dawn tal-aħħar. Din kienet ir-raba’ rebħa għal Enzo Potenza fl-era tiegħu bħala kowċ ta’ Marsaxlokk.
Ta’ nota huwa l-fatt li għal Balzan mexxa t-tim l-assistant coach Daryl Willard u mhux Dave Rodgers hekk kif dan tal-aħħar ma’ għadux fil-kariga.
Marsaxlokk għamlu l-intenzjonijiet tagħhom ċari mal-ftuħ tal-partita u wara biss tliet minuti fetħu l-iskor meta l-ewwel xutt ta’ Yuri De Jesus Messias ġie mblukkat f’corner mill-goalkeeper ta’ Balzan Dylan Ciappara, biex mill-corner li rriżulta, xutt ta’ Nikolai Muscat ġie devjat għal ġewwa minn Triston Caruana biex irriżulta auto-goal sfortunat.
Huma komplew fuq l-offensiva u fid-disa’ minuta xutt minn pożizzjoni ideali ta’ Yuri De Jesus Messias għadda ftit barra.
Iżda Balzan ma rmewx ix-xugaman anzi wettqu reazzjoni tajba u ta’ dan ġew ippremjati meta fit-22 minuta ġabu l-iskor indaqs hekk kif TRISTON CARUANA minn taħt il-lasta tefa’ ġewwa biex b’hekk patta bis-sħiħ għall-iżball li wettaq fl-azzjoni tal-goal ta’ Marsaxlokk kmieni fil-partita.
Marasaxlokk wieġbu fit-28 minuta meta Yuri de Jesus Messias għalkemm ixxamplat u żmarkat f’tarf il-kaxxa tefa’ inkredibbilment għoli.
Fit-43 minuta Balzan appellaw għal penalty meta Elvis Kamsoba deher li allegatament twaqqa’ minn difensur avversarju iżda r-referee Matthew De Gabriele ġġudika li Kamsoba kien wettaq simulazzjoni u kawża t’hekk ġie ammonit.
Balzan ħarġu ferm tajjeb fil-ftuħ tat-tieni taqsima u fil-55 minuta, kienu sfortunati li ma reġgħux marru fil-vantaġġ meta Jan Busuttil għadda tajjeb lejn Marcel Lima li kellu t-tentattiv tiegħu jistampa mal-wieqfa, bix-Xlukkajari jeħilsuha ħafif.
Mill-azzjoni li segwiet sekondi biss wara, Triston Caruana kellu x-xutt tiegħu salvat bi bravura minn Drobnjak.
Iżda kienu Marsaxlokk li dawru l-iskor favurihom fit-72 minuta meta YURI DE JESUS MESSIAS dar tajjeb ma’ tliet difensuri avversarji qabel spara l-ballun fis-saqaf tax-xibka, biex irriżulta goal mill-isbaħ, b’dan ikun it-48 goal tiegħu kemm ilu jilgħab Malta.
U biex l-affarijiet ikomplu ġejjin ħażin għal Balzan, fit-80 minuta huma qalgħu daqqa ta’ ħarta hekk kif spiċċaw jilagħbu b’10 players meta tkeċċa għalihom il-player Dimeji Awosanya wara li rċieva żewġ karti sofor fil-partita.
Marsaxlokk mal-ewwel dehru li bdew japprofittaw mill-fatt li bdew jilagħbu bi player iktar u tliet minuti wara, Nikolai Muscat minn pożizzjoni ferm ideali spara għoli biex b’hekk il-partita intemmet 2 – 1 favur Marsaxlokk.
Referee: Matthew DeGabrielle
Plejer tal-Logħba: Yuri De Jesus Messias (Marsaxlokk FC)
