Bħalma ġara nhar is-Sibt li għadda, fir-rebħa ta’ 2-1 kontra Balan, Marsaxlokk dawru telfa f’rebħa oħra, din id-darba ta’ 3-1 kontra Zabbar SP, b’din tkun it-tieni rebħa konsekuttiva għalihom taħt il-gwida tal-kowċ Taljan, Vincenzo Potenza. Wara li sofrew goal kmieni fil-partira, ix-Xlukkajri għarfu jwettqu reazzjoni mmedjata u ta’ dan ġew ippremjati permezz tat-tliet punti.
Kienu Marsaxlokk li ħolqu l-ewwel periklu fil-11-il minuta meta Yuri de Jesus Messias kellu l-konklużjoni tiegħu salvata mill-goalkeeper ta’ Zabbar, Luca Camilleri, biex mir-rebound Jose Ulies Arias reġa’ ra lil Camilleri jsalva tajjeb.
Iżda kienu Zabbar li fetħu l-iskor żewġ minuti bsss wara meta Brian Gambarte għadda tajjeb lejn DIOGO JOAO TAVARES li venven xutt fil-baxx għar-rokna tax-xibka li ma ta l-ebda ċans lill-goalkeeper Serb ta’ Marsaxlokk, Marko Drobnjak, għalkemm dan seta’ għamel aħjar.
Ix-Xlukkajri wieġbu fit-22 minuta meta daqqa ta’ ras mill-viċin ta’ Jai Quitongo li tħalla żmarkat għal kollox mid-difiża ta’ Zabbar, għaddiet ftit barra.
Iżda kienu Zabbar li għoddhom irduppjaw l-iskor tliet minuti wara meta ż-żagħżugħ ta’ 18-il sena Sean Gatt qabeż żewġ players fuq il-ġirja u permezz ta’ xutt minn tarf il-kaxxa tefa’ ftit barra.
Il-partita kompliet tisbieħ u fid-29 minuta Marsaxlokk ġabu l-iskor indaqs meta minn azzjoni ta’ corner mogħti minn Leonardo Aguirre, daqqa ta’ ras ta’ Alex De Aguilar Gomes ħabtet ma’ Jovecic u mal-mimduda, biex mir-rebound JAI QUITONGO bla ebda diffikultá u permezz ta’ daqqa ta’ ras oħra tefa’ ġewwa.
Huma komplew jiddettaw il-logħob u 10 minuti wara qalbu l-iskor favurihom permezz ta’ freekick mill-isbaħ tal-ispeċjalista LEANDRO AGUIRRE, bil-ballun jintemm fir-rokna tax-xibka.
Fil-ftuħ tat-tieni taqsima Zabbar ħarġu ferm aggressivi fit-tentattiv li jġibu l-iskor indaqs u fil-51 minuta, xutt mid-distanza ta’ Marcelo Barros Santos intemm ftit barra.
Huma komplew jippressaw u fis-77 minuta tilfu ċans tad-deheb li jġibu l-iskor indaqs meta Ilic waqqa’ l-ballun lura lej Vinicius de Paiva li kellu l-konklużjoni tiegħu bil-ballun li deher destinat għar-rokna tax-xibka, salvata proprju minn fuq il-linja minn Lucas Emanuel Dessypris.
Marsxalokk issiġillaw ir-rebħa permezz tat-tielet goal fil-ħin miżjud meta Alex Gomes De Aguilar approfitta minn żball fid-difiża Żabbarija, għadda tajjeb lejn DUANE BONNICI li permezz ta’ xutt fil-baxx tefa’ l-ballun fir-rokna tax-xibka.
Referee: Ishmael Barbara
Plejer tal-Logħba: Jai Quitongo (Marsaxlokk FC)
