Marsaxxlokk ikkonvinċew bis-sħiħ meta għelbu lil Gudja United bl-iskor ta’ 2-1. B’hekk wara erba’ partiti mingħajr rebħa fil-kampjonat, huma rritornaw għar-rebħ.
Kien fis-16-il minuta li Marsaxlokk ħolqu l-ewwel periklu permezz ta’ freekick ta’ Aguirre li ntemm għoli. Sitt minuti wara u x-Xlukkajri perikolużi meta xutt angulat fil-baxx ta’ Yuri De Jesis Messias, intemm barra.
Marsaxlokk, fetħu l-iskor fil-25 minuta permezz ta’ xutt tal-viċi-captain, Nikolai Muscat, li ntemm ġewwa biex sat-tmiem l-ewwel taqsima Marsaxlokk daħlu jistrieħu 1 – 0.
Marsaxlokk reġgħu ħolqu l-periklu wara għaxar minuti logħob fit-tieni taqsima meta Yurri De Jesus Messias indirizza l-ballun lejn Nevin Portelli iżda dan ma rnexxielux jagħmel kuntatt mal-ballun hekk kif il-pass kien kemmxejn twil.
Kulma jmur kompla d-dominju assolut tax-Xlukkajri u fit-63 minuta rduppjaw l-iskor meta wara li rċieva minn cross mix-xellug ta’ Ryan Scicluna, Weder Soares Da Silva, permezz ta’ daqqa ta’ ras mill-viċin tefa’ ġewwa.
Huma komplew jippressaw u minuta biss wara Nevin Portelli avvanza tajjeb fil-kaxxa iżda kellu x-xutt fil-baxx tiegħu salvat tajjeb mill-goalkeeper ta’ Gudja, James Pisani, li f’din il-partita kien qed jerġa’ jieħu post il-goalkeeper titolari, Justin Spiteri, li għadu qed jirkupra minn injury.
Gudja wieġbu fit-73 minuta meta Matias Muchardi ttanta xortih permezz ta’ xutt mid-distanza li ġie mdawwar f’corner bi bravura mill-goalkeeper tax-Xlukkajri, Marko Drobnjak.
Gudja United naqqsu l-marġni tal-iskor fid-90 minuta permezz ta’ xutt mill-viċin tas-sostitut, Luca Gatt, wara li rċieva minn azzjoni ta’ corner mogħti minn Aidan Jake Friggieri.
Referee: Daniel Portelli
BOV Plejer tal-Logħba: Yuru De Jesus Messias
