Kellu jkun goal tard fil-partita eżattament fit-82 minuta minn Sunday Akinbule li ta rebħa minima ta’ 1-0 lil Marsaxlokk fuq Floriana. B’hekk wara r-rebħa kbira ta’ 4-1 ta’ Hamrun Spartans fuq Santa Lucia fil-partita ta’ qabel, l-Ispartans qabżu b’punt lill-Greens, hekk kif Hamrun għandhom 58 punt fil-klassifika. Madankollu, xorta waħda, il-konfront dirett bejn l-Ispartans u l-Greens ta’ nhar is-Sibt li ġej mistenni jkun wieħed deċisiv għal fejn se jkun qed imur it-titlu.
Kienu Floriana li ħolqu l-ewwel periklu fit-13-il minuta meta l-iskorer prolifiku Luis Willis Furtado kellu x-xutt tiegħu mblukkat minn Matthew Calleja Cremona, biex mir-rebound Matheus De Sousa reġa’ mpenja lill-istess goalkeeper, b’din tkun ir-raba’ partita konsekuttiva li kien qed jiddefendi l-lasti Xlukkajri.
Maraxlokk wieġbu fis-26 minuta u appellaw għall-penalty mata Maksim Valadzko deher imis il-ballun b’idu fil-kaxxa iżda r-referee Trustin Farrugia Cann ħalla l-logħob għaddej fost protesti tal-players, diriġenti u partitarji tax-Xlukkajri.
Il-partita naqset mir-ritmu u kompliet ikkaratterizzata minn ħafna logħob f’nofs il-ground sat-tmiem l-ewwel taqsima.
Dan sat-58 minuta meta Yuri De Jesus Messias dar tajjeb ma’ difensur avversarju qabel ma permezz ta’ xutt fil-baxx minn ġol-kaxxa tefa’ barra, bil-Greens jeħilsuha ħafif.
Floriana wieġbu fis-66 minuta permezz ta’ cross-shot insidjuż ta’ Maksim Valadzko li ġie salvat bi bravura minn Calleja Cremona.
Il-pressjoni kienet kollha fuq il-Greens u fis-77 minuta tilfu ċans tad-deheb li jiftħu l-iskor meta wara li rċieva minn freekick tal-ispeċjalista Luis Willis Furtado, Maksim Valadzko, għola tajjeb u kellu d-daqqa ta’ ras tiegħu minn taħt il-lasta, tintemm ftit barra.
Madankollu kienu Marsaxlokk li skorjaw il-goal tar-rebħa fit-82 minuta meta Yuri De Jesus Messias provda l-assist lil Sunday Akinbule li avvanza tajjeb fil-kaxxa u spara ġewwa.
Wara dan il-goal kiesaħ u biered, Floriana dehru maħsuda għal kollox, iżda ħadu ftit nifs meta fid-90 minuta spiċċaw jilagħbu bi player iktar wara li tkeċċa l-awtur tal-goal tar-rebħa Sunday Akinbule wara li rċieva żewġ karti sofor f’temp ta’ sitt minuti.
Il-greens tefgħu kollox fuq l-attakk u fil-ħin miżjud appellaw għall-penalty meta s-sostitut Carlo Zammit Lonardelli deher jitwaqqa’ minn player avversarju, iżda r-referee Trustin Farrugia Cann ħalla l-logħob għaddej.
Marsaxlokk komplew jamministraw il-vantaġġ minimu li kellhom sa tmiem il-partita.
Referee: Trustin Farrugia Cann
BOV Plejer tal-Logħba: Matthew Calleja Cremona (Marsaxlokk FC)
