Marsaxlokk riedu biss punt biex jaċċertaw ruħhom mir-raba’ post, iżda kisbu tlieta meta f’partita ferm tattika, għelbu lil Hibernians bl-iskor ta’ 2-0, biex intemmet kull tama tal-Pawlisti, żgħira kemm kienet żgħira, li jiksbu post fl-Ewropa.
Kienu Hibernians li ħolqu l-ewwel periklu fid-19-il minuta meta Jurgen Degabriele għadda tajjeb lejn Rodney Antwi iżda pront sab lill-goalkeeper ta’ Marsaxlokk Matthew Calleja Cremona li ħareġ barra minn postu biex interċetta kull periklu.
Il-Pawlisti komplew jattakkaw u fl-24 minuta, il-Grieg Giannis Bastianos kellu xutt angulat minn ġol-kaxxa li ntemm ftit barra.
Fl-40 minuta, partitarji, players u diriġenti ta’ Hibernians ipprotestaw bil-kbir meta Calleja Cremona naqas milli jaħtaf il-ballun minn cross, bil-ballun jinżel eżatt u fuq il-linja, iżda skonthom il-ballun kien qabeż il-linja, bir-referee Glen Tonna fuq senjalazzjoni tal-assistant referee Duncan Sultana iżda ma jikkonvalidax il-goal.
Fil-ftuħ tat-tieni taqsima, Marsaxlokk, ħarġu ferm aggressivi u ta’ dan ġew ippremjati meta fit-53 minuta fetħu l-iskor meta d-difensur Karl Micallef għalkemm issikkat minn player avversarju, permezz ta’ xutt fil-baxx minn ġol-kaxxa tefa’ l-ballun fir-rokna tax-xibka.
Ix-Xlukkajri baqgħu jiddettaw il-logħob u mas-siegħa logħob resqu qrib li jirduppjaw l-iskor meta Yuri De Jesus Mesis approfitta minn indeċiżjoni fid-difiża ta’ Hibernians, avvanza fil-kaxxa iżda kellu x-xutt fil-baxx tiegħu jgħaddi ftit barra.
Il-pressjoni u l-urġenza kienu kollha fuq il-Pawlisti u fil-ħin sussegwenti ppruvaw iwettqu xi tip ta’ reazzjoni u fis-70 minuta, Bastianos, kellu x-xutt dijagonali tiegħu jiġi mdawwar f’corner minn Calleja Cremona.
Marsaxlokk wieġbu 10 minuti wara meta Yuri De Jesus Messias temm azzjoni personali permezz ta’ xutt li ġie devjat f’corner minn Alex Bruno De Souza Silva. Huma komplew jippressaw u fis-87 minuta, xutt minn tarf il-kaxxa ta’ Duane Bonnici għadda ftit barra.
Żewġ minuti biss wara Yuri De Jesus Messias avvanza tajjeb fil-kaxxa qabel ra x-xutt tiegħu mdawwar f’corner mill-goalkeeper żagħżugħ tal-Pawlisti, Hugo Sacco.
Fil-ħin miżjud, Marsaxlokk rebħu penalty meta Jacob Walker twaqqa’ fil-kaxxa minn player avversarju. Mill-il metru inkariga ruħu il-viċi-captain Nikolai Muscat, li spara ġewwa.
Ix-Xlukkajri komplew jamministraw il-vantaġġ doppju li kellhom sa tmiem il-partita.
Referee: Glen Tonna
BOV Plejer tal-Logħba: Karl Micallef (Marsaxlokk FC)
