Permezz ta’ wirja mill-aqwa Marsaxlokk komplew jikkonvinċu meta għelbu lil Mosta bl-iskor kbir ta’ 4-0. B’hekk wara r-rebħa daqstant ieħor kbira ta’ 5-0 kontra Melita, ix-Xlukkajri kisbu t-tieni rebħa konsekuttiva, biex f’żewġ logħbiet skorjaw disa’ goals u ma sofrew l-ebda goal.
Din kienet ukoll l-ewwel telfa għal Mosta wara tliet rebħiet konsekuttivi.
Permezz ta’ din ir-rebħa, Marsaxlokk, wettqu tpattija sportiva fuq il-Mostin, wara li fiż-żewġ logħbiet preċedenti bejn iż-zewġ timijiet matul dan l-istaġun, kienu Mosta li ħarġu rebbieħa bl-iskor ta’ 4-2 u 2-1 rispettivament.
Mosta kellhom lill-player Emmanuel Prince Chibuzor sospiż.
Ta’ nota huwa l-fatt li f’din il-partita it-terna arbitrali kienet komposta minn żewġ aħwa – Ezekiel Barbara bħala referee u Ishmael Barbara bħala assistant referee.
Marsaxlokk fetħu l-iskor wara biss minuta u nofs meta minn azzjoni ta’ corner id-daqqa ta’ ras ta’ LUCAS EMANUEL LOPEZ kienet salvata mill-goalkeeper ta’ Mosta Jorgen Demba, iżda mir-rebound l-istess player minn qagħda angolata kien pront u tefa’ l-ballun fix-xibka.
Mosta wieġbu fis-16-il minuta meta wara li rċieva minn corner, iż-żagħżugħ Nathan Agius kellu x-xutt tiegħu jintemm barra.
Marsaxlokk wieġbu fl-24 minuta permezz ta’ Yuri De Jesus Messias li żmarka lil JORGE AILTON SOARES li minn pożizzjoni angolata spara l-ballun fix-xibka. Huma komplew jiddettaw il-logħob u fis-36 minuta wara li rċieva minn freekick tal-ispeċjalista Leandro Aguirre, Alex De Aguilar Gomes kellu d-daqqa ta’ ras tuiegħu mill-viċin tintemm għoli.
Marsaxlokk skorjaw it-tielet goal fit-53 minuta meta minn azzjoni ta’ kontrattakk veloċi, Yuri De Jesus Messias provda l-assist lil JORGE AILTON SOARES li permezz ta’ lob delizzjuż mill-viċin tefa’ ġewwa, biex b’hekk irreġistra doppjetta personali.
Tliet minuti wara, Marsaxlokk ħolqu azzjoni oħra mill-aqwa li ntemmet permezz ta’ xutt sabiħ ta’ Yuri De Jesus Messias li ntemm ftit barra. Mosta wieġbu fil-75 minuta permezz ta’ xutt mid-distanza ta’ Giancarlo Goncalves li ntemm ftit barra.
Marsaxlokk issiġillaw ir-rebħa permezz tar-raba’ goal fis-86 minuta meta l-iskorer prolifiku Brażiljan ALEX DE AGUILAR GOMES b’xutt fil-baxx għeleb għal kollox lil Demba.
Huma komplew jamministraw il-vantaġġ komdu li kellhom sa tmiem il-partita.
Referee: Ezekiel Barbara
