Il-Kap taċ-Ċivil, is-Sur Mario Cutajar ċaħad bl-aktar mod kategoriku u bla ebda riservi dak li allega d-deputat Nazzjonalista Jason Azzopardi fil-Parlament, li abbuż mill-poter tiegħu. Mario Cutajar qal li dak li allega Azzopardi huwa ’l bogħod mill-verità.
Spjega kif meta sar Kap tas-Servizz Pubbliku fl-2013 tressqu għandu żewġ każijiet li jirrigwardaw uffiċjali pubbliċi. Wieħed kien dwar tbagħbis ta’ marki f’eżamijiet pubbliċi, bl-allegazzjoni tindika li dan ġieli sar fuq direzzjoni mill-Uffiċċju tal-Prim Ministru lill-eżaminaturi dirett u l-każ l-ieħor dwar abbuż, b’indħil ta’ persuni fl-amministrazzjoni ta’ qabel l-2013, tad-diskrezzjoni li tagħti l-liġi dwar it-taxxa lit-tmexxija ta’ dak id-dipartiment biex tiġi maħfura taxxa.
Cutajar qal li fiż-żewg każijiet u f’kull każ ieħor li kien jaf bih wara u sal-lum, fl-ebda ċirkustanza ma kellu kuntatt jew indaħal b’mod dirett jew indirett, anki bl-iktar mod remot possibbli fix-xogħol tal-Pulizija. Saħaq li ma ndaħalx kemm fix-xogħol tal-Kummissarju u kemm dak tal-uffiċjal investigatur.
Fi stqarrija Mario Cutajar fakkar li din hija t-tielet darba li Jason Azzopardi pprova jħammġu. L-ewwel darba meta allega u għamel storja li sar abbuż mill-pożizzjoni tas-Segretarju Permanenti Ewlieni, għax żagħżugħ kien nominat f’bord governattiv ta’ entità pubblika għax jiġi minnu. Hawnhekk Mario Cutajar qal li fil-fatt dan iż-żagħżugħ kellu biss l-istess kunjom tiegħu u la kien jiġi minnu u lanqas biss kien jafu.
Is-Sur Cutajar qal li Jason Azzopardi kien allega ukoll li bħala Kap taċ-Ċivil huwa abbuża mill-pożizzjoni tiegħu għax skont Azzopardi, Cutajar impjega membru tal-familja bħala persuna tal-fiduċja tiegħu. Hawnhekk ukoll, Mario Cutajar fakkar li kien hemm deċiżjoni tal-Qorti u l-fatti ppubblikati wrew li l-allegazzjoni ta’ Jason Azzopardi kienet ferm ’il bogħod mill-verità għax il-persuna kienet ilha impjegata tal-Gvern u ġiet konfermata lura fl-impjieg minn amministrazzjoni ta’ qabel l-2013. Mario Cutajar saħaq li saħansitra din il-persuna kienet taħdem f’Ministeru mmexxi dak iż-żmien minn Jason Azzopardi stess.
