Iċ-ċampjins Hamruns Spartans ħabbru l-akkwist tal-ex goalkeeper internazzjonali Taljan Federico Marchetti. Marchetti, li għandu 40 sena, sa l-istaġun li għadda kien fuq il-kotba tat-tim ta’ Spezia fis-Serie A fl-Italja.
Id-diskussjonijiet bejn ir-rappreżentanti ta’ Marchetti u dawk ta’ Hamrun Spartans ilhom għaddejjin għal dawn l-aħħar ġranet iżda intensifikaw wara li l-goalkeeper internazzjonali Malti Henry Bonello weġġa fil-partita ta’ kwalifikazzjoni li t-tim nazzjonali Malti kellu kontra l-Ukrajina.
Hamrun Spartans riedu goalkeeper ta’ esperjenza sabiex jaffaċjaw il-qawwa ta’ Maccabi Haifa fl-ewwel rawnd ta’ kwalifikazzjoni tal-UEFA Champions League tal-ġimgħa d-dieħla u kien għalhekk li xeħtu għajnejhom fuq goalkeeper ta’ esperjenza bħal Marchetti. Jidher li bejn il-kowċ il-ġdid ta’ Hamrun Luciano Zauri u lis-stess Marchetti hemm relazzjoni tajba li filfatt waslet sabiex l-ex goalkeeper ta’ Lazio, Genoa u Cagliari fost l-oħrajn jaċċetta l-offerta tal-Spartans.
Marchetti wasal f’pajjiżna fis-siegħat li għaddew u mistenni li jibda jitħarreġ mal-skwadra ta’ Hamrun immedjatament.
Ritratt: laziali.com
