L-andament turistiku din is-sena huwa fantastiku.
Dan sostnih Jesmond Debono, Manager ta’ lukanda ewlenija f’San Ġiljan f’kumment ma’ ONE News dwar l-andament b’saħħtu fis-settur turistiku din is-sena.
Qal, “Bħalissa ovvjament dejjem nagħmlu l-forecast tagħna, però din is-sena, bdejna b’saħħitna ħafna, però jidher li ħa tkompli b’saħħitha wkoll. Sal-aħħar tas-sena jidher li n-numri huma ħafna ’l quddiem minn kif kienu fl-2019, jiġifieri m’għandniex immorru ħażin, pjuttost ħa nkomplu mmorru b’numri ħafna, ħafna tajbin.”
Huwa sostna li minn Marzu, xahar li mhuwiex wieħed turistiku, il-lukanda kienet dejjem kważi mimlija, bir-rata ta’ okkupanza fil-lukanda li għandha kważi 300 kamra, kienet ta’ aktar minn 95%.
Jesmond Debono saħaq li fl-aqwa żmien turistiku f’pajjiżna, jiġifieri fix-xhur sajfin, l-andament huwa wieħed b’saħħtu aktar, tant li l-lukanda hija mimlija u dan jista’ jingħad sa Settembru.
Debono saħaq li dawn iċ-ċifri huma aqwa minn dak irreġistrat fl-2019 – is-sena ta’ qabel il-pandemija u s-sena li fiha f’pajjiżna ġew rekord ta’ turisti f’pajjiżna.
Stqarr, “L-andament huwa fantastiku. Għall-ewwel kien ovvjament ħafna inċertezzi x’ħa jiġri u ma jiġrix, però s-suq irkupra ħafna, anzi għandi pjaċir ngħid li mhux talli rkupra talli qbiżna l-aspettativi kollha. Aħna nikkumparaw ħafna ma’ 2019, biex naraw kif morna, aħna bħala din il-lukanda qbiżna ħafna iktar in-numri li kellna ta’ dak iż-żmien u s-suq inġenerali qisu qiegħed jagħmel l-istess biċċa xogħol.”
Dan huwa xhieda tar-rekord li qed jilħaq pajjiżna f’dan is-settur, anki kif ikkonfermat skont iċ-ċifri uffiċjali tal-Uffiċċju Nazzjonali tal-Istatistika, li ġew ippublikati l-Ġimgħa.
B’din l-istatistika turi li fl-ewwel nofs ta’ din is-sena, kien hemm żieda ta’ 81,000 persuna aktar mill-2019.
Ma’ din l-istatistika tal-NSO dwar l-andament pożittiv fis-settur turistiku, din il-ġimgħa kien hemm ċifri mill-MHRA u anki mill-Ajruport Internazzjonali ta’ Malta.
Jesmond Debono sostna li l-investiment fl-aħħar snin mill-kumpanija, u anki t-tħaddin tal-element tas-sostenibbilità, qed iħallu riżultati pożittivi.
Qal, “Aħna nemmnu ovvjament li inti ma tistax toffri prodott u tibqa’ bih, trid dejjem tkun innovattiv, trid dejjem tkompli tinvesti. Aħna konnha wħud mil-lukandi li anki waqt il-pandemija, meta konna magħluqin, għamilna investiment sostanzjali, kemm fil-lukanda u kemm bħala grupp, u jekk inti tkompli tinvesti, ovvjament tkompli tkun ma’ dawn ta’ quddiem.”
Sadanittant, dwar l-aħħar ċifri rekord u pożittivi, ONE News tkellem mal-Ministru għat-Turiżmu, Clayton Bartolo, li sostna li l-pjan tal-Gvern u tal-Awtorità Maltija għat-Turiżmu qed iħalli l-frott.
Stqarr, “Għaliex aħna rridu naraw li nkomplu niksbu iżjed ritorn fl-ekonomija ta’ pajjiżna minn dan il-pilastru ekonomiku li fih jaħdmu eluf ta’ nies. U għalhekk se nkomplu naħdmu biex niksbu iżjed suċċessi. Se nkomplu nieħdu iktar deċiżjonijiet li għandna nieħdu biex dawn is-suċċessi jkunu sostnuti għas-snin li ġejjin u naraw li jkollna impjiegi ta’ kwalità u karrieri li fuqhom jistgħu jiddependu l-Maltin u l-Għawdxin kollha kemm huma u għalhekk jien inħares ’il quddiem li nkomplu naħdmu iżjed, inkomplu ninvestu u naġġornaw dejjem iżjed il-prodott turistiku tagħna biex dan is-suċċess ikun sostnut ukoll għas-snin li ġejjin.”
