Mat-tokki ta’ nofsillejl tal-Erbgħa li għadda, jiġifieri meta tajna merħba lis-sena 2025, grupp ta’ Maltin, flimkien ma’ xi Taljani, irnexxielhom jiksru Guinness World Record.
Pyroemotions, il-kumpanija Maltija, li hi magħmula minn madwar 60 ħaddiem, li jinkludu disinjaturi, tekniċi, numru ta’ diretturi, u dawk inkarigati mil-loġistika. Din il-kumpannija kisret ir-rekord dinji waqt iċ-ċelebrazzjonijiet tal-Ewwel tas-Sena fil-Qatar bi 3,865 sparatura ta’ single shots minn 500 drones li tellgħu spettaklu uniku fl-ajru.
ONE News tkellem b’mod virtwali ma’ Andrea Scarpato, il-Kap Eżekuttiv u d-Direttur Kreattiv tal-kumpanija, kif ukoll ma’ James Camilleri, id-Direttur Ġenerali u Maniġer Tekniku.
Hawnhekk Camilleri enfasizza li din il-kisba kienet ta’ sodisfazzjon kbir għal kulħadd fil-kumpanija, minn dawk li ħadmu fuq il-programmar tekniku sa dawk responsabbli mil-loġistika u l-koordinazzjoni ġenerali. Huwa żied jgħid li dan ir-rekord mhux biss jagħmel unur lill-kumpannija iżda wkoll lir-reputazzjoni ta’ Malta f’dan il-qasam innovattiv.
“Hija emozzjoni kbira għax hija xi ħaġa li normalment tara fuq il-midja soċjali ta’ ħaddieħor. Din hija kisba kbira għal kulħadd li kien involut, sal-inqas ħaġa li għamel f’dan il-proġett.”
James Camilleri, DĠ Maniġer Tekninu, Pyroemotions
Scarpato spjega kif il-proġett kien jirrikjedi ħafna xogħol fuq id-dettalji. Wara xhur ta’ ppjanar, fl-aħħar xahar kien hemm sforz kbir biex jiġu finalizzati l-aħħar preparazzjonijiet għall-ispettaklu. Il-preparamenti kienu jinkludu ħafna affarijiet mill-ipprogrammar tad-drones għall-permessi u l-loġistika ta’ kif se jimxu l-affarijiet waqt ix-xow. Minkejja dan, huma spjegaw ma’ dan l-istazzjon kif l-akbar sforz jrid jkun waqt l-armar u waqt li jkun qed jiġi esegwit ix-xow innifsu.
“So we worked for 1 year to realise a special drone. This is a drone that has light and in the same drone we have 8 fireworks shot. We worked from December of last year to try to rise a new level from fireworks and drone, and we put in the sky in Qatar, 500 drones with 4000 firework shots.”
Andrea Scarpato, Kap Eżekuttiv u Direttur Kreattiv, Pytroemotions
James irrimarka kif dan ix-xogħol kien jinvolvi timijiet differenti jaħdmu flimkien b’koordinazzjoni perfetta. Id-drones tpoġġew b’mod strateġiku fuq diversi toroq u bjut biex jiżguraw l-aħjar effett viżiv. Dan kien il-punt kruċjali għall-ispettaklu, fejn kull komponent kellu jaħdem b’sinkronizzazzjoni eżatta.
“Armajna triq sħiħ, xi 14-il bejt, fuq xi 3 kilometri, u 4 torrijiet… il-bjut tagħhom”
James Camilleri, DĠ Maniġer Tekninu, Pyroemotions
Ix-xow ġibed l-attenzjoni ta’ mijiet t’eluf kbar ta’ nies fil-Qatar. Skont il-midja lokali, kien hemm madwar 300,000 ruħ isegwu dan l-ispettaklu teknoloġiku u wieħed mill-aktar avvanzati.
“Kien hemm folol kbar, folol esaġerati, għax kien l-uniku xow ġol-Qatar.”
James Camilleri, DĠ Maniġer Tekninu, Pyroemotions
