Rari nisimgħu u naraw disinjaturi tal-moda Maltin li jkollhom il-privileġġ li jissemmew mill- magażin magħruf tal-moda VOGUE. Iżda id-disinjatriċi Louise Aquilina rnexxielha.
Tfajla Maltija li għandha il-masters fil-moda minn Kingston University ta’ Londra bdiet id-ditta tagħha Demo Division. Hija spjegat lil one.com.mt kif din id-ditta kienet ibażata fuq ‘protest’ kontra l-mod ta’ kif is-soċjeta’ tirreferi għal kelma moda. Iżda hija temmen li Demo Division hija ferm aktar minn ilbies.
“Il-moda għaliha hija filosofija aktar milli prodott. In-nies jixtru l-prodott iżda l-aktar parti mportanti hija l-istudju wara l-prodott u l-oservazzjonijiet li jsiru sabiex tara t-tibdiliet li jkunu qed isiru fid-dinja tal-moda u nies kif jaħsbuha dwarhom. Il-prodott huwa r-riżultat ta’ dan kollu” qalet Aquilina.
Spjegat kif bħala parti mill- Masters degree tagħha hija kellha l-opportunita’ li t’esebixxi l-ħwejjeġ tad-ditta tagħha waqt il-fashion week ġewwa Londra. Iżda dan ma kienx l-unika żmien li hija qattgħet l-Ingilterra, spjegat li matul dan iż-żmien hija ħadmet sabiex tistabbilixxi d-ditta tagħha.
“F’ Lulju tal-2015 kont mistiedna nieħu sehem f’SEEK, sfilata tal-ħwejjeg tal-irġiel f’Berlin. Hemmhekk urejt l-ewwel kollezzjoni tiegħi u kelli kummenti tajba mill-midja. Kelli wkoll ix-xorti li nbiegħ din il-kollezzjoni lil wieħed mill-ħwienet f’ Hong Kong.”
Wara dan is-suċċess Louise irritornat lejn Malta flimkien mar-raġel tagħha Chris li huwa d-disinjatur tal-grafika tad-ditta tagħha. Hija kompliet taħdem fuq il-kollezzjoni ġdida tagħha minn pajjiżna, li esebit għat-tieni darba matul l-isfilata tal-ħwejjeġ SEEK f’Berlin.
Matul din l-isfilata hija kellha l-opportunita’ li tiltaqgħa ma’ rappreżentant minn Pitti Uomo li hija waħda mill-iżjed shows importanti fil-settur tal-moda, li tiffoka fuq il-ħwejjeġ tal-irġiel. Kien propju hu li stedinha biex tesebixxi l-kollezzjoni tagħha waqt show magħruf sew ma’ dawk li jsegwu l-moda ‘The Latest Fashion Buzz’.
Kien propju wara din l-isfilata li din id-disinjatriċi Maltija spiċċat fuq is-sit magħruf ta’ VOGUE ITALIA li fih ġiet deskritta bħala waħda mill-iżjed disinjaturi internazzjonali tal-moda promettenti.
