Żewġ irġiel tressqu l-Qorti b’rabta ma’ serq minn vetturi.
Stephen Urry ta’ 42 sena minn Raħal Ġdid nżamm arrestat filwaqt David Cavenati ta’ 33 sena, Taljan ukoll residenti Raħal Ġdid ngħata l-libertà proviżorja b’rabta ma’ dan il-każ.
Ir-reat seħħ bejn il-lejl tal-4 u l-5 ta’ Awwissu fi Triq Gian Anton Tanti Ħal Tarxien, għall-ħabta ta’ nofsillejl serqu nuċċali minn karozza.
Barra minn hekk, ġew mixlija wkoll b’attentat ta’ serq minn karozza oħra minn Triq L-Alfier De Medran għad-detriment ta’ terzi persuni.
It-tnejn ġew mixlija wkoll li wettqu ħsara volontarjament fuq iż-żewġ vetturi.
L-Ispettur Paul Camilleri li mexxa l-Prosekuzzjoni qal li daħal rapport fl-għassa tal-Pulizija minn persuna anonima. Huma ġew identifikati ftit tal-ħin wara u ftit l’isfel minn fejn instabu mill-Pulizija instab ukoll puntell li allegatament intuża waqt is-serq.
In-nuċċali misruq mill-vettura nstab fuq wieħed mill-imputati waqt it-tfittxijiet li wettqu l-uffiċjali tal-Pulizija.
Urry, li ma jaħdimx u hu riċediv, kien ukoll mixli waħdu li seraq skrataċċ minn karozza separata bejn il-lejl tas-16 u s-17 ta’ April 2021 minn Triq Melita, Paola.
Fil-każijiet kollha l-akkużi kienu aggravati bil-mezz, ħin u xorta tal-ħaġa misruqa.
Id-difiża ma għażlitx li tikkontesta l-validità tal-arrest tal-imputati.
Stephen Urry wieġeb mhux ħati għall-akkużi miġjuba kontrih filwaqt li t-Taljan Cavenati wieġeb ħati tal-akkużi u kkomferma l-ammissjoni tiegħu wara s-seduta ġiet sospiża.
L-avukat tal-għajnuna legali nnota kif minkejja li t-tnejn kienu flimkien meta nqabdu mill-Pulizija, Cavenati qal li Urry ma kienx involut fir-reat.
It-Taljan stqarr li hu jixtieq li jidħol għall-programm għar-rijabilitazzjoni tad-droga.
B’hekk il-Qorti għażlet is-separazzjoni tal-ġudizzju bejn l-imputati.
Id-difiża għamlet talba għal-libertà proviżorja għan-nom ta’ Stephen Urry wara d-dikjarazzjoni li għamel Cavenati. Apparti minn hekk, id-difiża argumentat li minkejja l-gravità tal-akkużi dak li ġara mhumiex daqstant gravi minħabba dak li nsteraq. It-talba saret wkoll in vista wkoll li r-raġel għandu indirizz postali fiss.
L-avukat difensur qal ukoll li minkejja l-fedina penali ta’ Urry dan m’għandux problema ta’ affidabiltà.
Il-Prosekuzzjoni oġġezzjonat għat-talba tal-ħelsien mill-arrest. Din argumentat li nstabu wkoll marki tas-swaba’ f’karozza li sar ir-reat fuqha filwaqt li qalet li l-imputat, li għandu problema akuta tad-droga, mhuwiex affidabbli u jista’ jinfluwenza lix-xhieda.
Intqal, kif ir-raġel għandu diversi proċeduri fid-distrett u għamel żmien ma jidhirx għas-seduti tiegħu b’rabta ma’ reat li jmur lura għall-2018.
Għaldaqstant, il-Qorti ppreseduta mill-Maġistrat Leonard Camilleri ċaħdet it-talba għall-ħelsien mill-arrest minħabba l-inaffidabilità tal-imputat għaldaqstant dan inżamm arrestat.
Fil-konfront tal-imputat Cavenati, id-difiża stqarret li l-imputat ilu hawn Malta mill-2016 u minkejja l-problema tad-droga li għandu mhuwiex magħruf mal-Pulizija filwaqt li enfasizzat it-talba tal-imputat biex jirrabilità ruħu mill-vizzju tad-droga.
L-Ispettur Camilleri kkomferma t-talba tar-raġel għall-programm iżda huwa m’għandux indirizz fiss. Dan minħabba li l-indirizz li pprovda huwa tas-sieħba tiegħu u li minnu ġieli ntalbet l-assitenza tal-Pulizija stess sabiex dan jinħareġ mir-residenza.
Wara li l-Qorti semgħet it-trattazzjoni tal-Prosekuzzjoni u d-difiża fil-konfront tal-piena ta’ Cavenati ddeċidiet li ikkundannatu għall-ordni ta’ libertà proviżorja għal żmien sentejn wara li sabitu ħati. Dan filwaqt li ordnat li r-raġel jingħata l-kura dwar il-vizzju tad-droga tiegħu mill-uffiċjal tal-probation fi żmien xahar.
Il-Qorti ordnatlu ukoll jagħmel tajjeb għad-danni li huwa kkawża lil terzi persuni.
