It-tim Malti tan-nisa ta’ taħt il-ħmistax-il sena bħalissa qed jieħu sehem f’turnew fit-Tajlandja fejn ilbieraħ rebħu l-ewwel logħba tagħhom 3 – 2 kontra l-Mongolja.
It-tim immexxi minn Dorianne Theuma bdew tajjeb ħafna tant li wara żewġ minuti marru fil-vantaġġ grazzi għal awtogoal. Fis-26 minuta Haley Bugeja għamlet l-iskor 2 – 0 bl-avversarji jnaqqsu d-distakk minuta wara biex l-iskor sat-tmiem l-ewwel taqsima baqa’ dak ta’ 2 – 1.
Mas-60 minuta t-tim Malti skorrja t-tielet goal tiegħu permezz ta’ Veronique Mifsud u erba’ minuti mit-tmiem it-tim tal-Mongolja reġgħu naqqsu d-distakk għall-iskor finali ta’ 3 – 2.
It-tim Malti jerġa’ jkun impenjat għada kontra Singapore fl-10am, ħin lokali.
