L-għada li fil-Belt ta’ Berlin diversi pajjiżi, fosthom ir-Renju Unit, l-Istati Uniti u t-Turkija ddisskutew iż-żamma tal-paċi fil-Libja, il-Ministru għall-Affarijiet Barranin Evarist Bartolo saħaq li fl-ewwel laqgħa tiegħu fil-Kunsill tal-Ministru għall-Affarijiet Ewropew, ħareġ li għad baqa’ ħafna xi jsir sabiex is-sitwzzjoni f’dan il-pajjiż tiġi lura għan-normal.
“Fil-laqgħa waħda mis-suġġetti ewlenin kienet is-sitwazzjoni fil-Libja, l-għada tal-konferenza li saret Berlin fejn hemmhekk iltaqgħu diversi pajjiżi li huma mdaħħlin f’din is-sitwazzjoni biex iddiskutew u jaraw għall-inqas l-ewwel pass ċkejken imma pass importanti li jieqaf il-ġlied, għax jekk ma jieqafx il-ġlied ma tistax tippjana x’ser tagħmel biex terġa’ tagħti ħajja ġdida lil-Libja u lil-Libjani terġa’ ssir normali.”
Il-ġlied militari bejn iż-żewġ mexxejja rivali tal-Libja, Haftar u Saraj, diġà wassal għall-mewt ta’ mijiet ta’ persuni, fosthom tfal.
Il-Ministru Bartolo qal li jidher li għalkemm l-ewwel passi għall-qbil bdew jittieħdu għadu kmieni wisq biex wieħed jibda jiċċelebra l-paċi, bil-pass li jmiss għandu jkun diskussjoni serja.
“Il-pass li jmiss issa huwa li wieħed jara li jieqaf il-ġlied bis-serjetà u ż-żewġ naħat jibdew jitkellmu kif għandhom iżommu l-paċi, jiġifieri s-sitwazzjoni għadha diffiċli għax f’Berlin m’hemmx għalfejn ngħidlek, iż-żewġ mexxejja Sarraj li hu rikonoxxut mill-Ġnus Maqgħuda u Haftar li qed jattakka minn Benghasi biex jieħu kontroll tal-Libja kollha l-anqas biss iltaqgħu biex jitkellmu aħseb u ara biex jiftehmu li jkun hemm il-paċi”
Bartolo saħaq li f’sitazzjonijiet bħal dawn Malta jista’ jerġa’ jkollha rwol ferm importanti, hekk kif qed toffri biex sservi bħala bażi fejn il-mexxejja rivali jiltaqgħu u jiddiskutu l-paċi.
“Aħna bħas-soltu ċ-ċokon tagħna nużawh għall-paċi biex noffru li naħat differenti jistgħu jiltaqgħu hawn jiddiskutu hawn u nkomplu noffru wkoll l-għajnuna tagħna biex ngħinu fit-taħriġ u fl-edukazzjoni ta’ uffiċjali Libjani nagħtu sehemna biex il-Libja jerġa’ jkollna l-paċi.”
Il-Ministru semma kif dak li qed jiġri bħalissa f’dan il-pajjiż jista’ jolqot lil Malta b’żieda ta’ immigrazzjoni lejn pajjiżna, iżda sostna li ser iżomm il-ġid tal-poplu Malti u Għawdxi quddiem għajnejh.
Intant, ftit jiem wara li ħa l-ħatra f’dan l-irwol ġdid, il-Ministru Bartolo sostna li għalkemm ilu seba’ snin jattendi fil-laqgħat tal-Kunsilli Ewropej, xorta waħda baqagħlu x’jitgħallem, hekk kif dan il-qasam jġib miegħu bosta sfidi ġodda li jistgħu jkunu ta’ importanza kbira għall-pajjiżna.
Ritratt: Ray Attard
