Permezz ta’ wirja ferm konvinċenti, it-tim nazzjonali Malti tan-nisa kiseb double fuq Georgia meta wara r-rebħa stretta ta’ 3-2 nhar il-Ġimgħa li għadda barra minn darna fi Tbilisi, din id-darba ġewwa darna fis-Centenary Stadium f’Ta’ Qali għeleb lill-istess Georgia bl-iskor daqtant ieħor strett ta’ 2-1, bil-goals għall-Maltin jaslu wieħed f’kull taqsima minn Rachel Cuschieri u Haley Bugeja rispettivament.
Il-Maltin iddominaw il-partita għall-ħinijiet twal iżda bħalma ġara fil-partita ta’ barra minn darna, Georgia, wettqu rimonta mill-aqwa tard fil-partita fejn irnexxielhom anke jnaqqsu l-marġni tal-iskor u saħansitra setgħu iġibu l-iskor indaqs.
B’hekk issa l-Maltin għandhom disa’ punti minn tliet rebħiet minn Grupp C2 tal-UEFA Women’s Nations League permezz ta’ rebħa kontra Andorra u żewġ rebħiet kontra Georgia.
Għall-Maltin irritornat fl-azzjoni d-difensur veterana Charlene Zammit, iżda kellhom jgħaddu mingħajr is-servizzi ta’ Emma Lipman minħabba li kienet sospiża, fejn minflokha assumiet r-responsabbiltajiet ta’ captain, il-player Rachel Cuschieri, li fetħet l-iskor għall-Maltin f’din il-partita.
Kien biss fil-35 minuta li waslet l-ewwel azzjoni denja ta’ nota b’Georgia jkunu huma li joħolqu l-periklu meta kienet Teona Bakradze venvnet xutt minn barra l-kaxxa li gie salvat tajjeb mill-goalkeeper Maltija, Janice Xuereb.
Iżda kienu Malta li fetħu l-iskor fid-39 minuta meta minn azzjoni ta’ corner, il-ballun intemm għand RACHEL CUSCHIERI li b’xutt mill-ewwel ħasdet għal kollox lill-goalkeeper ta’ Georgia, Tatia Gabunia. Fil-ħin miżjud tal-ewwel taqsima, Georgia kellhom gowl ta’ Natia Daniella imħassar wara irregolarita’ min-naħa tagħha.
Fil-ftuħ tat-tieni taqsima, il-Maltin ħarġu ferm aggressivi u fit-48 minuta, Maria Farrugia indirizzat cross preċiż li sab lil Kailey Willis li kellha x-xutt fil-baxx tagħha salvat minn mal-art mill-goalkeeper ta’ Georgia, Tatia Gabunia.
Huma komplew fuq l-offensiva u fit-52 minuta Maria Farrugia kellha x-xutt mill-ewwel tagħha minn ġol-kaxxa jintemm għoli.
Georgia wieġbu sitt minuti wara permezz ta’ xutt mill-viċin ta’ Nino Chkhartishvili li ġie salvat bi bravura minn mal-art minn Xuereb.
Iżda kienu Malta li rebħu penalty fid-59 minuta meta l-iskorer prolifiku ta’ Inter Haley Bugeja twaqqgħet fil-kaxxa minn Lizi Mtskerashvili. Mill-11-il metru inkarigat ruħha l-istess HALEY BUGEJA li ma żbaljatx hekk kif permezz ta’ xutt b’saħħtu tefgħet il-ballun fir-rokna tax-xibka.
Fid-69 minuta il-Maltin kienu għddhom skorjaw it-tielet goal meta Rachel Cuschieri kellha t-tentattiv tagħha mill-viċin salvat parzjalment minn Gabunia biex wara taħwida fil-kaxxa, il-ballun intemm għand Shona Zammit li permezz ta’ xutt fil-baxx minn pożizzjoni ideali reġgħet lil Gabunia issalva bi bravura minn mal-art, biex salvat goal ċert.
Huma komplew jiddettaw il-logħob u fl-74 minuta reġgħet kienet Shona Zammit li ħolqot il-periklu meta din ix-xutt tagħha minn ġol-kaxxa intemm barra.
Kulma jmur kompla d-dominju assolut tal-Maltin u fid-79 minuta, Maria Farrugia serviet fuq platt tal-fidda lil Haley Bugeja li kellha x-xutt mill-viċin tagħha salvat tajjeb minn Gabunia.
Georgia wieġbu żewġ minuti biss wara meta l-istilla ta-tim Teona Bakradze kellha x-xutt tagħha minn qagħda ideali salvat bi bravura minn Xuereb.
Huma komplew jippressaw u fit-82 minuta, Natia Danelia, mill-viċin laqtet il-wieqfa, bil-Maltin jeħilsuha ħafif.
Azzjoni wara l-oħra huma naqsu l-marġni tal-iskor żewġ minuti wara, meta minn azzjoni ta’ freekick mogħti minn Lizi Mtskerashvili, MARIAM KALANDADZE mill-viċin tefgħet ġewwa.
Iżda kienu l-Maltin li komplew jamministraw il-vantaġġ minimu li kellhom sa tmiem il-partita.
Ritratt: Craig Camilleri
