Il-Ministru għall-Affarijiet Barranin u Promozzjoni tal-Kummerċ Carmelo Abela indirizza l-128-il sessjoni tal-Kumitat tal-Ministri tal-Kunsill tal-Ewropa f’Elsinore, id-Danimarka. Il-Kunsill, li jħares prinċipalment id-drittijiet tal-bniedem, hu magħmul minn sebgħa u erbgħin stat membru, inklużi l-istati membri kollha tal-Unjoni Ewopea.
Fil-laqgħa ġew diskussi diversi suġġetti li jirrigwardjaw l-stabbiltà fl-Ewropa, riformi fid-demokrazija, id-drittijiet tal-bniedem, l-istat tad-dritt, u l-assigurazzjoni fit-tul tas-sistema tal-Konvenzjoni Ewropea dwar id-Drittijiet tal-Bniedem, kif ukoll dwar il-kooperazzjoni mal-Unjoni Ewopea.
Il-Ministru Abela semma l-ħidma ta’ Malta biex tgħin lill-Kunsill tal-Ewropa jwettaq il-programm ta’ attivitajiet tiegħu, b’mod partikolari f’dak li għandu x’jaqsam mad-drittijiet tal-bniedem.
Ir-riżultat pożittiv ta’ Malta fir-rigward tad-drittijiet tal-bniedem jikklassifika fost l-ogħla fl-Ewropa. F’Jannar li għadda, Malta ppromulgat l-Abbozz tal-Vjolenza u l-Vjolenza Domestika bbażata fuq il-Ġeneru biex tipproteġi n-nisa u l-bniet kontra l-vjolenza. F’Marzu li għadda, daħlet fis-seħħ il-Konvenzjoni Kontra t-Traffikar ta’ Organi Umani. Dan ifisser li Malta se tittratta t-tneħħija illegali ta’ organi umani bħala reat kriminali. F’Marzu wkoll, il-gvern Malti estenda d-drittijiet tal-vot għal mhux inqas minn 8,500 votant tal-età bejn is-sittax u sbatax-il sena, biex Malta saret it-tieni pajjiż tal-UE li estenda d-drittijiet tal-vot għal ċittadini ta’ taħt it-tmintax-il sena. Barra minn hekk, ir-ratifika ta’ Malta tal-Protokoll Numru 15 tal-Konvenzjoni Ewropea tad-Drittijiet tal-Bniedem, li għandha tagħmel lill-Qorti ta’ Strasburgu aktar effiċjenti u effettiv, tiżgura wkoll li s-sistema tad-drittijiet tal-bniedem tibqa’ prijorità vitali fl-Ewropa. Malta tappoġġja wkoll l-istrateġija tal-Kunsill tal-Ewropa dwar id-drittijiet ta’ persuni li jbatu minn kull forma ta’ diżabilità, inklużi kundizzjonijiet imtejba tax-xogħol.
Din il-laqgħa temmet magħha l-Presidenza Daniża tal-Kumitat tal-Ministri li damet sitt xhur fejn ingħaddiet il-Presidenza lill-Kroazja sa Novembru 2018.
Fil-marġini tal-Kumitat tal-Ministri, il-Ministru Abela kellu wkoll laqgħa bilaterali mas-Segretarju Ġenerali tal-Kunsill tal-Ewropa Thorbjørn Jagland.
