Waqt intervista fuq ONE Radio, il-Prim Ministru u Mexxej Laburista Robert Abela tkellem dwar l-importanza tat-tkabbir ta’ pajjiżna fil-fażi ta’ tranżizzjoni ekonomika.
Qal li ma jistax ikun hemm progress soċjali jekk ma jkunx hemm tkabbir ekonomiku u dak jista’ jilħaq l-aspirazzjonijiet tan-nies. Il-Prim Ministru sostna li pajjiżna jrid jikber fis-setturi importanti, li permezz tagħhom tgawdi s-soċjetà.
“U pajjiżna jrid ikompli jikber ekonomikament. Semmili pajjiż wieħed madwar id-dinja kollha li ma jaspirax li jkollu tkabbir ekonomiku u tgħidli għaliex din l-enfażi fuq it-tkabbir ekonomiku li jagħmel fuqha kull pajjiż? Għax it-tkabbir ekonomiku, meta jkun wieħed sostenibbli, naturalment, hu katalista tal-progress soċjali. Ma jistax ikollok progress soċjali, jekk ma jkollokx tkabbir ekonomiku sostenibbli.”
Il-Prim Ministru Robert Abela
Il-Prim Ministru sostna li pajjiżna qed iħares li jirnexxi b’nies li għandhom kwalità u ħiliet, waqt li jkunu ambjentalment sostenibbli. Bl-enfażi dwar dan hi l-edukazzjoni u t-taħriġ biex aktar Maltin jieħdu l-opportunitajiet li hemm f’xogħlijiet li għandhom pagi b’saħħithom.
“It-tkabbir fejn narah jiena: f’dawk is-setturi li jipproduċu u joffru karrieri aħjar. Meta ngħid karrieri aħjar huma dawk li jagħtu salarji aħjar, dak li jagħtu kundizzjonijiet tax-xogħol aħjar li huma aħjar u għat-tkabbir ekonomiku li jkun katalista għall-ambjent aħjar u mhux ikun tkabbir ekonomiku li jiġi head-on mal-ambjent. Jien nemmen li t-tkabbir ekonomiku sostenibbli u t-tisħiħ ambjentali jimxu flimkien u huma kumplimentari għal xulxin.”
Il-Prim Ministru Robert Abela
Fost is-setturi li semma l-Prim Ministru li se jkompli jinvesti fihom hemm it-teknoloġija, il-gaming u start-ups ta’ kwalità.
Hawnhekk il-Prim Ministru nnota li, bil-kontra tal-Gvern, il-Partit Nazzjonalista qed jagħmel attakki fuq setturi li qed jissaħħu u jkabbru l-ekonomija.
“Imbagħad xi jkollok, ironikament, ikollok Partit Nazzjonalista li jattakka bl-aktar mod insensat dawn it-tip ta’ setturi. Rajna x’attakk insensat, attakk b’saħħtu għalxejn, għamel fuq l-industrija tal-films f’pajjiżna. Industrija li qed toffri tant u tant impjiegi ta’ kwalità lill-Għawdxin u lill-Maltin. L-attakk, storja vvintata kompletament li għamel li se tagħlaq kumpanija tal-gaming. Is-soltu politika tagħhom, ta’ qtigħ il-qalb, ta’ negattività. Politika li fil-fehma tiegħi ma twasslek għal imkien.”
Il-Prim Ministru Robert Abela
Robert Abela għadda wkoll dan il-messaġġ b’saħħtu dwar il-ħaddiema li jiġu minn barra l-pajjiż.
“Hemmhekk għandek sitwazzjoni fejn l-operaturi fl-ekonomija tagħna deħlin lejn żewġ bidliet li huma kbar: it-tranżizzjoni diġitali u t-tranżizzjoni għall-qalba ambjentali. Għandek diversi kumpaniji f’pajjiżna li dawn il-bidliet diġà bdew jaħdmu fuqhom u jinsabu mexjin fihom. Se jfisser li trid tidħol għalihom b’impenn kbir u ’l hemmhekk iridu mmorru, imma r-riżultat tagħhom se jkun wieħed pożittiv li se jħalli riżultati b’saħħithom. Però dawk li ma jagħmlux dawn il-bidliet, allura mbagħad, irrid nibgħat żewġ messaġġi. Investituri li se jkunu qed jimxu lejn dik id-direzzjoni, lejn it-taħriġ tal-ħaddiema, lejn il-kundizzjonijiet tax-xogħol aħjar, lejn il-kwalità, investiment fit-teknoloġija, lejn it-tranżizzjoni ambjentali, lejn It-tranżizzjoni diġitali, hemmhekk se jsibu Gvern li huwa totalment warajhom, kif dejjem konna, nimbottaw ’il quddiem bl-inċentivi, nagħtu l-kuraġġ, nagħtu dak is-sostenn li hu meħtieġ. Però, min-naħa l-oħra, lil dawk operaturi fis-suq tagħna li mhumiex lesti li jimxu ma’ din id-direzzjoni strateġika ekonomika u se jinjoraw din id-direzzjoni u se jibqgħu jiffokaw il-mudell tax-xogħol tagħhom fuq ġib, ġib, ġib kemm tiflaħ ħaddiema barranin u malli tixba’ minnhom, ibgħathom lura ’l barra mill-pajjiż, hemmhekk il-pożizzjoni se tibqa’ li se nibqgħu niefqu, kif diġà qegħdin nagħmlu lil dawn l-operaturi.”
Il-Prim Ministru Robert Abela
