Il-Ministru għall-Inklużjoni u l-Volontarjat Julia Farrugia mexxiet delegazzjoni għas-Summit Dinji tad-Diżabilità f’Berlin, organizzat mill-gvernijiet tal-Ġermanja u tal-Ġordan, flimkien mal-International Disability Alliance. Dan is-Summit kien opportunità eċċellenti għall-iskambju dwar l-aħjar prattiċi fis-settur tad-diżabilità, ma’ rappreżentanti ta’ gvernijiet oħra minn madwar id-dinja, kif ukoll minn għaqdiet internazzjonali.
Il-Ministru kellha laqgħat bilaterali mal-kontroparti tagħha mil-Lussemburgu u mill-Kroazja. Il-Ministru Lussemburgiż Max Hahn wera interess fil-metodoloġija li qed tadotta Malta fir-rigward tar-riforma ta’ assistenza personali u baġits personali, żewġ oqsma fejn il-Lussemburgu jixtiequ li jdaħħlu skemi u liġijiet fuq il-mudell Malti. Intant, il-Ministru qasam ma’ Malta numru ta’ inizjattivi, kemm prattiċi kif ukoll leġiżlattivi, illi l-Lussemburgu adotta sabiex jiżgura l-aċċessibilità elettorali.
Mas-Segretarju tal-Istat Kroata Marija Pletikosa ġie diskuss proġett Ewropew li huma sħab fih kemm Malta kif ukoll il-Kroazja, sabiex ikunu jistgħu jaħdmu flimkien, kif ukoll jitgħallmu mingħand xulxin, dwar l-oqsma tal-assistenza personali u d-de-instituzzjonalizzazzjoni. Ġiet diskussa wkoll skema Kroata għall-inklużjoni ta’ tfal awtistiċi fl-isport.
Il-Ministru Julia Farrugia fissret l-importanza ta’ aktar kollaborazzjonijiet internazzjonali li jkomplu jixprunaw progress b’saħħtu hawn Malta. “Il-kollaborazzjoni internazzjonali fil-kamp tad-diżabilità hija essenzjali biex nistgħu nindirizzaw l-isfidi komuni li jiltaqgħu magħhom il-pajjiżi madwar id-dinja. L-għan tagħna huwa li noħolqu soċjetajiet aktar inklussivi u aċċessibbli, fejn persuni b’diżabilità jkollhom opportunitajiet indaqs bħal kulħadd. Pajjiżna impenjat li jkompli jwettaq riformi innovattivi li jkomplu jixprunaw progress fis-settur,” temmet tgħid il-Ministru.
Il-Ministru kienet preżenti wkoll għal sessjoni mtella’ minn Malta, flimkien ma’ sħab oħra minn madwar l-Ewropa, dwar il-proġett ACTIVATE. Organizzata fil-Jum Dinji dwar l-Awtiżmu, kienet sessjoni mmexxija minn żgħażagħ awtistiċi, għal żgħażagħ awtistiċi, sabiex jitrawmu minn xulxin permezz tal-metodu train the trainer, bħala attivisti futuri. Dan il-proġett, b’finanzjament ta’ kwart ta’ miljun ewro mill-Unjoni Ewropea, u mmexxi minn Malta, se jħejji wkoll materjali ta’ referenza għal professjonisti, familjari u alleati oħra fis-soċjetà.
Id-delegazzjoni Maltija ltaqgħet ukoll mal-Prinċep Mired Raad Zeid Al-Hussein tal-Ġordan, il-President tal-Kunsill Għoli tal-Ġordan dwar id-Drittijiet ta’ Persuni b’Diżabilità. Il-Prinċep faħħar lil Malta għall-avvanzi li għamlet f’ħafna oqsma relatati mad-diżabilità. Dan tennieh ukoll Dott. Muhannad Al Azzeh, is-Segretarju Ġenerali tal-Kunsill, u Membru tal-Kumitat tal-Ġnus Magħquda dwar id-Drittijiet ta’ Persuni b’Diżabilità.
Ġew diskussi, fost oħrajn, it-tema ta’ deistituzzjonalizzazzjoni, u l-koperazzjoni li ilha għaddejja bejn iż-żewġ pajjiżi, flimkien ma’ esperti internazzjonali, fuq il-programmi nazzjonali tagħhom. It-turiżmu aċċessibbli ukoll kien tema kritika għaż-żewġ pajjiżi, kif ukoll l-inklużjoni fil-qasam edukattiv, inizjattivi rilevanti, u l-importanza ta’ standards u monitoraġġ.
Il-Prinċep tal-Ġordan esprima r-ringrazzjament u l-apprezzament tiegħu lejn il-Gvern ta’ Malta illi, kif ħabbar il-Prim Ministru Robert Abela, sejjer joffri kura lil tfal midruba fl-attakki li qed isiru fuq Gaża, b’ tali appoġġ jorbot mal-proġett Hope imħabbar mir-Re Abdullah II tal-Ġordan.
Il-Ministru Farrugia kienet akkumpanjata mill-Ambaxxatriċi ta’ Malta għall-Ġermanja Marlene Bonnici, u s-Segretarju Permanenti tal-Ministeru Anthony Gatt.
