Meta fil-Lussemburgu kien qed jiġi diskuss regolament ġdid dwar it-tnaqqis tal-emissjonijiet serra, Malta żammet iebes u kien biss wara l-intervent tal-Ministru José Herrera, li l-Kunsill tal-Ministri inkluda lil pajjiżna mal-lista ta’ pajjiżi li għandhom aġġustament fejn jidħol il-livell annwali ta’ emissjonijet għall-perjodu 2021-2030.
Oriġinarjament Malta ma kinitx fost dawk fil-lista ta’ pajjiżi li l-Kummissjoni Ewropea kienet qed tqis bħala pajjiżi li għandhom bżonn jagħmlu sforz eċċessiv biex jingħataw din il-konċessjoni, u li ma kienx għall-intervent tal-Ministru Herrera, Malta kien ser jibda jkollha ġġorr piż finanzjarju akbar kull darba li teċċedi l-miri stabbiliti minn Brussel fejn jidħlu l-emissjonijiet ta’ gassijiet li ġejjin minn setturi li ma jinkludux l-enerġija, bħalpowerstations. “Anke jekk dak propost mill-Kummissjoni Ewropea mhux biżżejjed biex jieħu kont taċ-ċirkostanzi ġeografiċi ta’ pajjiżna, l-aġġustament fil-livelli ta’ emissjonijiet huwa pass fid-direzzjoni t-tajba biex iċ-ċittadini Maltin ma jġorrux piż aktar u akbar milli jifilħu. Illum pajjiżna ġie kkumpensat għax żamm iebes u ma ċediex għall-pressjoni ta’ pajjiżi akbar minnu”, qal il-Ministru Herrera.
F’Ottubru tal-2014, il-Kunsill Ewropew iddeċieda li meta mqabbel mal-1990, l-emissjonijiet ta’ gassijiet serra (GHG) fis-setturi ekonomiċi kollha jonqsu b’40% sal-2030. Din il-proposta timplimenta wkoll l-impenji tal-Unjoni Ewropea (UE) skont il-ftehim ta’ Pariġi dwar it-tibdil fil-klima, li Malta kienet fost l-ewwel li rratifikat. Il-Ministru Herrera qal li filwaqt li pajjiżna jaqbel li kull pajjiż għandu jagħmel l-almu kollhu tiegħu biex inaqqas l-emissjonijiet serra, dan m’għandux jiġi tradott f’eżerċizzju finanzjarju impost fuq iċ-ċittadini tal-UE jekk il-kalkoli ma jkunux realistiċi. Dak li għandu bżonn pajjiżna u pajjiżi oħrajn tal-UE huma riformi bis-serjetà li jġibu bidla fil-mentalità u mhux l-introduzzjoni ta’ piżijiet finanzjarji ġodda.
Il-Ministru José Herrera, li kien qed jattendi għall-Kunsill tal-Ministri tal-Ambjent tal-UE, akkumpanjat mid-Deputat Rappreżentant Permanenti Lorenzo Vella, qal li fl-aħħar snin Malta għamlet bidla radikali fil-qasam tal-enerġija li hija tajba għall-ambjent u tajba għal saħħitna. Bl-istess mod il-Gvern beda jiddiskuti, kif ukoll qed jagħti l-inċentivi, biex aktar nies jinvestu f’vetturi elettriċi flok dawk bil-fuel, fosthom eżenzjoni mit-taxxa u li ma jħallsux liċenzja tat-triq. Il-Ministru José Herrera qal li l-Gvern daħħal għadd ta’ miżuri, inkluż fl-aħħarbudget, biex jinċentiva l-użu tat-trasport pubbliku kif ukoll mezzi alternattivi għall-karozzi privati. Dan apparti miżuri bla preċedent bħall-introduzzjoni tal-borża organika fl-immaniġjar tal-iskart. Dan ukoll ser iwassal għal anqas emissjonijiet ta’ gassijiet serra billi jitnaqqas l-ammont ta’ skart li sejjer ġewwa l-landfill.
Il-Ministru temm l-intervent tiegħu billi appella għall-bidla fil-mentalità minflok l-introduzzjoni ta’ miżuri li jweġġgħu lill-pajjiżi li jridu jkabbru l-ekonomija tagħhom b’mod sostenibbli jekk verament il-pajjiżi tal-UE jridu jagħmlu l-bidla li jmiss fejn jidħlu l-emissjonijiet tal-gassijiet serra. “Malta lesta u ser tikkollabora, imma dan m’għandux ikun għad-detriment ta’ kalkoli mhux realistiċi intiżi biss li jitfgħu piż u mhux inċentivi għal bidliet radikali li qed, u ser inkomplu, nagħmlu bħala Gvern u pajjiż”, temm jgħid il-Ministru Jose’ Herrera.
