Malta tinsab mal-aqwa għaxar pajjiżi minn madwar id-dinja, li qed tiġġieled it-tibdil fil-klima.
Dan ħareġ f’rapport dwar it-tibdil fil-klima tal-aġenzija GermanWatch, li jagħmel monitoraġġ tal-miżuri li qegħdin jieħdu il-pajjiżi biex inaqqsu l-effetti tat-tibdil fil-klima.
Dan l-indiċi, li huwa wieħed indipendenti, janalizza t-tnaqqis tal-emissjonijiet, il-ġenerazzjoni tal-elettriku b’enerġija rinovabbli u l-użu tal-enerġija, fost oħrajn.
F’dan l-indiċi, Malta ġiet ikklassifikata fit-tnax-il post, b’punteġġ ta’ iżjed minn erbgħa u sittin punt. Fl-ewwel tliet postijiet ma ġie klassifikat ħadd, minħabba li l-ebda pajjiż fid-dinja ma ġab punti li jaqbżu t-tmenin u allura b’hekk jista’ jingħad li pajjiżna fil-fatt jinsab fid-disa’ post.
Hawnhekk pajjiżna qabeż il-medja tal-Unjoni Ewropea bi kważi ħamsa fil-mija.
Fl-ewwel postijiet ġew il-pajjiżi Skandinavi, hekk kif fl-ewwel tliet postijiet ġew id-Danimarka, l-Iżvezja u n-Norveġja.
Waqt li mal-aħħar għaxar postijiet hemm taħlita ta’ pajjiżi żviluppati u oħrajn mhux żviluppati, fosthom l-Istati Uniti, l-Awstralja, il-Kanada, l-Iran u l-Arabja Sawdija.
F’dan ir-rapport ħareġ kif pajjiżna għandu prestazzjoni tajba fit-tnaqqis tal-emissjonijiet u anke fl-użu tal-enerġija.
Fejn jidħol tnaqqis fl-emissjonijiet, Malta ġiet fis-sitt post, fejn ġabet aktar minn wieħed u tletin punt minn erbgħin.
Fl-użu tal-enerġija, Malta tinsab fit-tielet post, hekk kif ġabet iżjed minn sittax-il punt minn total ta’ għoxrin punt.
Dwar l-enerġija rinovabbli, Malta ġabet ftit inqas minn nofs minn total ta’ għoxrin. Hawnhekk, pajjiżna qabeż il-medja tas-sebgħa u għoxrin pajjiż tal-Unjoni Ewropea.
Bħalissa s-suġġett tat-tibdil fil-klima jinsab fuq nett tal-aġenda, fil-kuntest tal-Konferenza tal-COP26 fi Glasgow.
Meta indirizza din il-Konferenza tal-Ġnus Magħquda, il-Prim Ministru Malti Robert Abela spjega li Malta hija disposta li tgħin gżejjer żgħar oħra jegħlbu l-isfidi li qed iġib it-tibdil fil-klima.
Hawnhekk Dr Abela ħabbar li pajjiżna ser jirdoppja l-fondi fil-fond ambjentali tal-Ġnus Magħquda u issa l-kontribut ta’ Malta tela’ għal mitejn elf ewro.
Ritratt: NASA
