Il-Gvern Malti nstab li ma kienx qed jikser il-liġi Ewropea permezz tal-għażla tal-ġudikanti.
Dan permezz ta’ deċiżjoni li tat il-Qorti Ewropea tal-Ġustizzja, it-Tlieta filgħodu, f’kawża li fetħu l-Avukati Simon Busuttil, Jason Azzopardi u Therese Comodini Cachia f’isem l-għaqda Repubblika.
F’sentenza ta’ ħmistax-il paġna, il-Qorti Ewropea tal-Ġustizzja innutat li Malta qatt ma ħadmet kontra s-saltna tad-dritt u l-liġi Ewropea.
Innutat kif il-Prim Ministru Robert Abela anki mar pass ’il quddiem u reħa l-poter minn idu fl-għażla tal-persuni li jpoġġu fuq il-bank tal-ġudikatura.
Id-deputati tal-Oppożizzjoni u l-għaqda Repubblika marru quddiem il-Qorti Ewropea tal-Ġustizzja kontra l-Gvern Malti talli l-Prim Ministru kien jaħtar ġudikant wara li jkunu għaddew mill-għarbiel tal-Kumitat għall-Ħatriet tal-Ġudikanti li fih hemm il-Prim Imħallef, fost oħrajn.
Il-Gvern immexxi mill-Prim Ministru Robert Abela kompla jsaħħaħ is-sistema, li kienet ferm iktar rigoruża mis-snin passata, fejn il-Prim Ministru kien jaqbad u jaħtar ġudikant hu mingħajr għarbiel ta’ xejn.
Fil-fatt f’riformi kbar bla preċedent, il-Prim Ministru Robert Abela reħa l-poter minn idu u issa l-politiku m’għadux involut fil-proċess tal-ħatriet tal-ġudikanti.
Dawn issa qed jinħatru wara sejħa pubblika u jiġu mgħarbla u magħżula mill-kumitat għall-ħatriet tal-ġudikanti.
Dawn ir-riformi li wettaq il-Gvern ta’ Dr Abela sabu anki l-appoġġ tal-Kummissjoni Venezja.
Ir-riformi ġew innutati fid-deċiżjoni tagħha tant li l-Qorti Ewropea tal-Ġustizzja faħħret il-mod ta’ kif jinħatru l-ġudikanti, dan hekk kif semmiet kif it-twaqqif tal-Kumitat dwar il-Ħatriet tal-Ġudikatura, qed isaħħaħ il-garanzija ta’ indipendenza tal-membri tal-ġudikatura.
Intqal ukoll li anke jekk il-Prim Ministru jagħżel kandidat mhux mill-Kumitat tal-Ħatriet, xorta waħda jrid imur quddiem il-Parlament sabiex il-ġudikant jinħatar.
Il-Qorti Ewropea għall-Ġustizzja rrimarkat li l-Prim Ministru jista’ jkollu l-poter li jaħtar ġudikant u dan minkejja li f’Malta dan mhux il-każ, riżultat tar-riformi li wettaq il-Gvern.
B’rabta ma’ din id-deċiżjoni, fuq Twitter, il-Prim Ministru Robert Abela laqa’ d-deċiżjoni tal-Qorti Ewropea tal-Ġustizzja u saħaq li din tikkonferma li l-Gvern Malti jħaddan is-saltna tad-dritt u jaħdem favur is-sewwa.
Qal li l-Qorti Ewropea tal-Ġustizzja rrikonoxxiet ir-riformi li twettqu u li s-sistema ġudizzjarja ta’ pajjiżna ssaħħet favur l-interessi taċ-ċittadini Maltin u Għawdxin.
Intant f’kumment ma’ ONE News, il-Ministru għall-Ġustizzja Edward Zammit Lewis innota kif din l-aħbar qed iserraħ ras in-nies.
“Timlina kuraġġ għaliex isserraħ ras iċ-ċittadin għax meta tmur il-Qorti, jaf li hemm quddiemu xi ħadd li huwa indipendenti u huwa imparzjali. Però aktar aktar minn hekk, l-amministrazzjoni Robert Abela illi fl-2020 u għadna għaddejjin, s’issa baqa’ għaddej b’riformi fejn tidħol il-ħatra u d-dixxiplina tal-ġudikatura, qegħdin fid-direzzjoni t-tajba u qed nagħmlu riformi favur il-governanza u s-saltna tad-dritt, biex inkunu fuq quddiem fl-Ewropa u anke fil-komunità internazzjonali.”
