“Jekk trid tibqa’ relevanti għall-komunitajiet, il-Commonwealth trid tantiċipa l-opportunitajiet tal-innovazzjoni billi tara li l-pajjiżi jaħdmu flimkien, jisimgħu iktar liċ-ċittadini tagħhom, u b’hekk itejbu l-ħajjiet tan-nies”. Dan kien il-messaġġ tal-Prim Ministru Joseph Muscat waqt il-Forum tal-Commonwealth dwar l-Innovazzjoni li qed jitlaqqa’ bħalissa fi Brisbane, l-Awstralja.
Dr Muscat qal li l-innovazzjoni hija proċess twil mibni fuq il-bżonnijiet taċ-ċittadini. Sostna li l-ewwel ħaġa li tiġi f’moħħ nies tal-ġenerazzjoni tiegħu huwa l-internet – sistema li bidlet id-dinja kollha bis-siti elettroniċi, l-email, apps biex jintbagħtu messaġġi, u social media. Kienu kollha ideat innovattivi li ma ħarġux minn laboratorju xjentifiku imma mill-ħtiġijiet tal-familji u n-negozji.
Il-Prim Ministru qal li pajjiż żgħir bħal Malta qed isir nazzjon ta’ suċċess bla preċedent. B’popolazzjoni ta’ inqas minn nofs miljun u art limitata, Malta mhux talli qed jirnexxilha tkampa, iżda qiegħda tmexxi, mhux biss fl-ekonomija, imma anke fit-titjib tal-kwalità tal-ħajja billi tagħmel il-bżonnijiet tan-nies sors ta’ innovazzjoni.
Huwa kompla billi qasam mument li esperjenza bħala Prim Ministru b’riżultat ta’ Gvern li Jisma’, meta kien irċieva email mingħand omm li staqsiet huwiex possibli li titmexxa ‘l quddiem id-data li fiha jintbagħat iċ-children’s allowance bl-għan li tkun tista’ tuża l-flus biex tkopri l-ispejjeż tal-bidu ta’ sena skolastika ġdida. Dak li pproponiet din il-mara, fil-fatt twettaq.
Ħafna jaħsbu li din il-bidla kienet waħda ta’ sens komun, iżda għal ħafna oħrajn kienet bidla innovattiva li għamlet differenza kbira fil-ħajja tagħhom.
“Malta hija każ tajjeb ta’ kif l-innovazzjoni qed titħaddem fil-prattika. Quddiem ir-riżultati tajbin ħafna li qed jikseb fit-tkabbir tal-ekonomija u ħolqien tax-xogħol, pajjiżna jista’ jagħżel li jieħu pass lura. Iżda qed jagħmel il-kuntrarju”, qal Dr Muscat.
Fl-aħħar xhur, pajjiżna ħoloq regolamentazzjoni ġdida għal żewġ setturi ġodda – il-produzzjoni ta’ mediċini bbażati fuq il-kannabis, u s-settur tal-blockchain – li fihom jemmen li jista’ jkun fuq quddiem nett fid-dinja.
Qal li jekk Malta, b’popolazzjoni ta’ nofs miljun kapaċi timxi f’din id-direzzjoni, wieħed jista’ jimmaġina kemm jista’ jsir mill-pajjiżi tal-Commonwealth b’popolazzjoni ta’ żewġ biljuni.
Il-Prim Ministru temm jgħid li innovazzjoni li qatt ma tfalli hija dik li tibqa’ tinbidel maż-żmien billi tisma’ lill-komunitajiet u taġġusta għar-realtajiet ta’ kuljum biex toħloq opportunitajiet għall-ġenerazzjonijiet tal-futur.
