Malta trid tkun fit for the future b’workforce imħarreġ għas-setturi li pajjiżna se jkun qed jiġbed lejh fiż-żmien li ġej, qal is-Segretarju Parlamentari Aaron Farrugia fl-ewwel laqgħa uffiċjali mal-General Workers’ Union.
Biex dan isir, l-imsieħba soċjali u l-Gvern iridu jaħdmu ħalli l-ħaddiema Maltin jitħarrġu f’setturi ġodda, u l-istudenti jkunu ggwidati biex jagħżlu suġġetti ġodda għal karrieri li llum ma joħolmux li jkollhom, qal Aaron Farrugia, filwaqt li saħaq li dinja globalizzata tfisser sfidi u opportunitajiet kbar li pajjiżna jrid jirbaħ.
“Id-djalogu soċjali bejn l-imsieħba soċjali kapaċi jwassal għal kunsens bejn dawk kollha konċernati – liema kunsens ħareġ biċ-ċar fil-qbil għal żieda fil-paga minima, fejn daħal mekkaniżmu li grazzi għalih il-paga minima se tibda togħla kull erba’ snin. Dan hu l-mod kif għandna naħdmu fiż-żmien li ġej għax bi djalogu soċjali b’saħħtu, pajjiżna jasal fil-quċċata fejn jixraqlu”, spjega s-Segretarju Parlamentari.
Is-Segretarju Ġenerali tal-GWU Josef Bugeja qabel li s-suċċess tad-djalogu soċjali kien dovut għall-aċċessibilità li gawdew l-imsieħba soċjali, fosthom il-GWU, fid-diskussjonijiet mal-Gvern u mal-Prim Ministru. Il-GWU tista’ tixhed dan speċjalment fil-ħidma kontra l-impjieg prekarju li l-Gvern ikkonsulta, ta widen u implimenta miżuri biex ikun miġġieled dan l-abbuż, qal is-Sur Bugeja.
Il-GWU temmen li kulħadd irid jaħdem għall-għaqda fil-pajjiż biex jitwassal messaġġ li l-ebda sezzjoni tal-poplu ma tibqa’ emarġinata, qal Josef Bugeja filwaqt li faħħar l-impenn u l-parteċipazzjoni tal-union fid-diskussjonijiet li saru biex tfasslu l-emendi fil-liġi taż-żwieġ biex fil-pajjiż ikollna żwieġ indaqs.
Iż-żewġ naħat qablu li jridu jimxu mill-ħolqien tax-xogħol għall-ħolqien tal-karriera. Waqt id-diskussjoni ssemmew ukoll il-prijoritajiet tal-Gvern skont il-manifest elettorali – fosthom il-festi pubbliċi, kif ukoll ir-riforma maħsuba f’entitajiet ta’ fora ta’ diskussjoni għall-imsieħba soċjali, u t-tkabbir ekonomiku. Is-Segretarju Parlamentari qal ukoll li l-pajjiż se jżomm ir-ritmu ekonomiku li kiseb fl-aħħar leġiżlatura – din hi ċ-ċavetta biex ikollna l-prosperità meħtieġa sabiex il-ġid jissarraf f’aktar xogħol u f’xogħol aħjar.
