L-investiment multi-miljunarju mill-kumpanija De La Rue, li se jara l-ħolqien ta’ mitt impjieg, ma waqax mis-sema iżda jeżisti minħabba d-deċiżjonijiet li ħa l-Gvern waqt il-pandemija.
Terry Zammit, Direttur u Maniġer tas-sit tad-De La Rue f’Malta, spjega kif din tiġġenera mat-tletin miljun ewro kull sena fl-ekonomija ta’ pajjiżna u sostna li wħud mill-aqwa ħaddiema tal-kumpanija madwar id-dinja huma Maltin.
Huwa spjega: “Iva, għandna impjegati kif forsi ntqal qabel, li ilhom magħna mill-bidu nett. Hawn impjegati li ilhom hawn ħamsa u sebgħin sena, għandhom esperjenza kbira li hija mfittxa minn postijiet madwar id-dinja. Meta jinqalgħu xi problemi madwar id-dinja f’postijiet oħra, aħna nibgħatu l-impjegati tagħna biex jgħinu l-faċilitajiet tagħna madwar id-De La Rue, u l-istess isir bil-kontra, u dik il-kollaborazzjoni hija importanti anke biex nuru l-kapaċitajiet li għandna aħna bħala Maltin u biex ngħinu jiġi dan l-investiment.”
Il-Ministru għall-Ekonomija, Silvio Schembri stqarr li dan l-investiment ma ġiex b’kumbinazzjoni, iżda l-Gvern kien ilu jaħdem sabiex din il-kumpanija jkollha dak kollu li għandha bżonn biex taħdem u tikber fi xtutna.
Huwa qal, “Niftakar fl-eqqel tal-pandemija, fejn pajjiżi oħra kienu qed jagħmlu lockdowns, kien hemm il-biża’ li hawn ukoll ikun hawn lockdown u allura din il-fabbrika kienet se tagħlaq il-produzzjoni tagħha. Dak iż-żmien bħala Ministru tal-Ekonomija, tajt dikjarazzjoni bil-miktub lid-deriġenza De La Rue, li jekk ikun hawn lockdown, f’dak iż-żmien il-prodott tagħhom kien se jibqa’ meqjus bħala servizz essenzjali u allura ma jiġux affettwati. Dak iż-żmien kien iż-żmien ukoll fejn id-De La Rue kienu qed jiddeċiedu jkabbrux hawnhekk, jew f’pajjiż ieħor fl-Ażja.”
Il-Ministru għall-Intrapriża, Miriam Dalli qalet li din il-kumpanija ddeċidiet li tikber f’Malta grazzi għall-ħidma u għajnuna tal-Malta Enterprise, li biha setgħet tkompli tibni fuq ix-xogħol li qed isir sabiex jiġu attrattati aktar investimenti.
Hija stqarret: “Dan l-investiment huwa grazzi tal-ħidma tal-Malta Enterprise biex irnexxielna nirbħu l-kompetizzjoni minn pajjiżi oħra. Il-fatt li De La Rue qed tinvesti f’pajjiżna u qed tinvesti b’dan il-mod, juri l-fiduċja li għandhom l-investituri barranin f’pajjiżna, f’din il-gżira, fit-tim ta’ Malta u fil-ħila tal-ħaddiema Maltin u Għawdxin.”
Il-Kap Eżekuttiv ta’ De La Rue stqarr li meta kien hemm opportunità għal tkabbir, kienu l-ħiliet u l-ambjent favorevoli għan-negozji li għamluha ċara li Malta hija l-gżira fejn għandhom jinvestu.
Huwa sostna: “We made an investment initially in 1975, we trusted the country then, ever since then we’ve been growing. We’ve grown three hundred times from where we were that first year in 1975, and my message is that this is one of the best places in the world to invest for business.”
