Fiż-żmien propizju, Malta lesta tirrikonoxxi lill-Palestina bħala stat. Iddikjara dan il-Prim Ministru Robert Abela waqt attività politika tal-Partit Laburista bit-tema ‘Is-Saħħa lill-Maltin’ fil-Marsa. Hawnhekk Dr Abela fakkar kif Malta, flimkien ma’ tliet stati membri tal-Unjoni Ewropea, qablu li, meta ċ-ċirkostanzi jippermettu, jirrikonoxxu lill-Palestina bħala stat.
Dr Abela sostna kif, fl-aħħar sigħat, Roberta Metsola pprovat tirredikola l-pożizzjoni ta’ Malta dwar ir-rikonoxximent tal-Palestina bħala stat, meta hi ħadet pożizzjoni li wasslet biex inqatlu eluf ta’ persuni f’Gaza, bil-maġġoranza tagħhom huma tfal u nisa.
“Jien emmint illi mal-paċi mhemmx kompromessi, ma’ dak li jemmen fih dan il-pajjiż mhemmx kompromessi, ma’ dak li hemm fil-Kostituzzjoni tagħna mhemmx kompromessi, daqs kif mhemmx kompromessi man-newtralità ta’ pajjiżna. Imma mbagħad imxejna pass ieħor. Meta kien hemm bżonn li nikkuraw tfal, trabi mill-Palestina, ilqajnihom b’idejna miftuħin biex ġew f’pajjiżna u tajnihom l-aqwa kura li hi meħtieġa. Dawn it-tfal, illum, f’Malta jsibu darhom.”
Il-Prim Ministru Robert Abela
Fil-Marsa, il-Prim Ministru tkellem ukoll dwar kullana ta’ proġetti li qed isiru mill-Gvern, immexxi minnu, f’din il-lokalità. Intqal hawn ingħalaq iċ-ċentru miftuħ u l-piż ma ntefax fuq xi post ieħor. Semma l-binja antika tat-Tram Power Station li minn stat dilapitat se tingħata lura lin-nies hekk kif se tiġi rrestawrata.
“Imbgħad dan il-Gvern, mill-2013 ’il quddiem, x’għamel? Għalaq dik li kienet pjaga f’din il-lokalità, il-power station l-antika, u llum issa rridu immorru għall-pass li jmiss, li dik li kienet ġerħa għal din il-lokalità nagħmluha ġawhra. U tista’ ssir ġawhra. Nemmen li tista’ ssir waħda mill-isbaħ ġawhar ta’ dan il-pajjiż. U għalhekk li, bħalissa, f’dak is-sit, li għandu tant valur, qed issir reviżjoni tal-Pjan Lokali mill-Awtorità tal-Ippjanar biex nidentifikaw dak li jkun l-aqwa għal din il-lokalità u mbagħad jittellaq proġett li din il-lokalità se jkompli jittrasformaha f’lokalità li jien, minn qalbi, nemmen li għandha tant u tant potenzjal. Il-Marsa li hi tant sabiħa u rridu nkomplu ninvestu fiha.”
Il-Prim Ministru Robert Abela
Meta mistoqsi dwar l-accounts mhux awditjati u mhux ippubblikati tal-Partit Nazzjonalista, Dr Abela wieġeb hekk.
“X’qal Bernard Grech, qal li ma sabx awditur biex jippreżentalu l-kontijiet. U jien ngħidlu, b’min qed tipprova tidħak inti? Qed taħseb illi għadek kif kont f’tant snin illi ħlist it-taxxa, jew evadejt it-taxxa sakemm imbagħad ma qabdukx l-awtoritajiet? Dik l-istess mentalità għadu. Jaħseb li jista’ jbella’ lil kulħadd. U mbagħad qalilna li se jippreżentahom u ma ppreżentahomx, u hemmhekk ukoll fejn il-Kummissjoni Elettorali trid tieħu ħsieb u li tagħmel xogħolha, u tagħmel xogħolha skont ma tgħidilha l-liġi. Però l-akbar risposta trid tkun tagħkom, tagħkom li fit-8 ta’ Ġunju tibgħatu messaġġ ċar li, le, mhuwiex aċċettabbli li partit politiku, hu min hu, sfaċċatament jikser il-Liġi tal-Finanzjarment tal-Partiti.”
Il-Prim Ministru Robert Abela
Dr Abela semma wkoll l-inizjattiva ‘Stabbiltà’, li se tibqa’ mill-inqas sa Ottubru li ġej, waqt li fakkar kif il-Partit Nazzjonalista hu kontra din l-inizjattiva li qed tgħin għal kontra l-inflazzjoni.
Il-Prim Ministru Robert Abela temm b’dan il-messaġġ.
“Id-deċiżjoni hi f’idejkom, fit-8 ta’ Ġunju agħtu messaġġ b’saħħtu. Ivvotaw lill-kanditati kollha tal-Partit Laburista għall-Elezzjoni tal-Parlament Ewropew, għall-Elezzjonijiet tal-Kunsilli Lokali, biex b’dik it-turija ta’ fiduċja, nibqgħu nimplimentaw il-manifest elettorali ‘Malta Flimkien’. Nibqgħu nimplimentaw il-manifest tagħna – kunsilli lokali. B’hekk nagħtu s-saħħa lill-Marsin, is-saħħa lill-Għawdxin, u s-saħħa lill-Maltin.”
Il-Prim Ministru Robert Abela
