Indiċi xjentifiku li sar minn ċentru tal-istudji ambjentali fl-Università ta’ Yale, fl-Istati Uniti, ipoġġi lil Malta mal-aktar pajjiżi fid-dinja li qed jieħdu azzjoni dwar it-tibdil fil-klima. Fl-istess waqt, jippremja lil pajjiżna għall-akbar avvanzi relatati li twettqu fl-aħħar għaxar snin fost 180 pajjiż.
Ħabbret dan iI-gazzetta KullĦadd, li rrimarkat li dawn ir-riżultati jirriflettu s-sitwazzjoni saħansitra qabel ma kienu bdew jitwettqu f’pajjiżna proġetti bla preċedent favur l-ambjent li, fl-istess waqt, itejbu l-għajxien tan-nies. Dawn jinkludu proġetti bla preċedent ta’ reklamazzjoni urbana, b’investiment ta’ €700 miljun, b’artijiet żviluppati jinħattu u jingħataw lura lill-poplu fi spazji miftuħa li jkunu jistgħu jitgawdew minn kulħadd.
Il-gazzetta tosserva li l-politika nazzjonali tal-Gvern Malti għal din il-leġiżlatura hi ffokata primarjament fuq dan, bl-aħħar manifest elettorali Laburista jagħti l-akbar prijorità lill-ambjent.
Dan l-aħħar ċertifikat internazzjonali għal pajjiżna mill-Yale Center for Environment Law & Policy (YCELP) jirrikonoxxi fost l-aħjar riżultati għal Malta f’diversi oqsma speċifiċi relatati mal-ambjent bejn l-2012 u s-sena l-oħra, li waslu b’riżultat ta’ ħidma, miżuri, liġijiet, u anke l-mentalità differenti ta’ gvernijiet Laburisti mill-2013 ’il quddiem.
L-indiċi jikklassifika lil Malta fit-tielet post fost il-pajjiżi fl-Unjoni Ewropea, wara d-Danimarka u l-Finlandja. Mill-pajjiżi kollha madwar id-dinja li ġew studjati, Malta tinsab fir-raba’ post, maqbuża biss minn dawn iż-żewġ pajjiżi Skandinavi u mir-Renju Unit.
Fir-rapport tagħhom dwar Malta, l-esperti fl-Università ta’ Yale tawna l-punteġġ ġenerali ta’ 75.2, b’qabża ta’ 25.4 punti fuq għaxar snin ilu. Din kienet l-akbar żieda rreġistrata minn fost il-180 pajjiż, inklużi dawk ferm akbar minna u li huma rinomati għall-impenn tagħom fil-qasam tal-ambjent, fosthom l-Awstrija u l-Iżvizzera. Dawn spiċċaw fit-tmien u d-disa’ post rispettivament fil-klassifika globali.
Għalkemm l-indiċi hu kkonċentrat fuq l-ambjent, l-istudju tal-Yale Center for Environment Law & Policy jidħol ukoll f’setturi relatati mal-amministrazzjoni pubblika fil-pajjiżi. F’dan ir-rigward, Malta wkoll irreġistrat titjib sostanzjali. Fil-fatt, ir-rapport ipoġġi lil pajjiżna fl-ewwel post fejn jidħol it-titjib fl-effettività tal-Gvern, fis-saltna tad-dritt, fil-kontroll tal-korruzzjoni, u fil-kwalità regolatorja. Fil-kategoriji ta’ stabbiltà politika u n-nuqqas ta’ vjolenza fil-pajjiż ġejna kklassifikati fit-tielet post, mill-ġdid wara d-Danimarka u l-Finlandja.
Dawn ir-riżultati huma wkoll mera tal-ħidma li twettqet u li għadha qed titwettaq f’dawn l-oqsma mill-Gvern Laburista. Din il-ħidma ssemmiet reċentement waqt laqgħa li l-Prim Ministru Robert Abela kellu fil-Berġa ta’ Kastilja mal-Kummissarju Ewropew għall-Ġustizzja, Didier Reynders. F’dik il-laqgħa ġie diskuss kif il-Gvern Malti jikkonsulta bis-sħiħ u l-ħin kollu mal-Kummissjoni Ewropea, fost l-oħrajn dwar l-implimentazzjoni ta’ għadd ta’ riformi favur it-tisħiħ tas-saltna tad-dritt, il-ġustizzja, u l-governanza f’pajjiżna.
Fost l-għadd kbir ta’ riformi li twettqu minn din l-amministrazzjoni hemm il-metodu ġdid ta’ ħatriet f’diversi karigi importanti, bħal dik tal-President tar-Repubblika, il-Kummissarju tal-Pulizija u fil-ġudikatura, inkluż tal-Prim Imħallef, fejn il-Gvern reħa kull poter minn idejh.
