Stħarriġ dwar is-sentiment ekonomiku fost in-negozji u l-konsumaturi fil-pajjiżi kollha tal-Unjoni Ewropea, li jsir kull xahar mill-Kummissjoni Ewropea, wera li, matul ix-xahar t’Ottubru, Malta kellha valur fl-indiċi ta’ 103, li jfisser 3% iżjed mill-medja storika u l-aqwa riżultat għal din is-sena.
Bil-maqlub, il-medja Ewropea kienet 4% inqas mill-medja storika u anke inqas minn xahar qabel.
Hawn Malta rreġistrat l-akbar żieda minn fost il-pajjiżi kollha. Dan anke jekk il-baġit kien għad ma tħabbarx, iżda r-riżultat seta’ rrifletta l-aspettattivi pożittivi li kien hemm għall-miżuri li l-Gvern kien diġà beda jitkellem dwarhom fil-ġimgħat ta’ qabel.
F’Malta s-sentiment fost il-familji hu aħjar mill-medja storika u ferm aħjar mill-Ewropa. L-istħarriġ tal-Kummissjoni Ewropea jindika li maġġoranza tal-familji qed jistennew li jżidu t-tifdil tagħhom fix-xhur li ġejjin. L-ammont ta’ dawk li jistennew żieda fil-prezzijiet naqas mindu daħlet fis-seħħ l-iskema ‘Stabbiltà’ fi Frar li għadda.
Fl-industrija lokali, waqt li l-produzzjoni żdiedet fil-maġġoranza tal-kumpaniji, l-ażjendi kważi kollha qalu li qed jonqsulhom l-ordnijiet, indikazzjoni tas-sitwazzjoni internazzjonali negattiva.
Min-naħa tal-ħwienet f’pajjiżna, is-sentiment hu wkoll aħjar mill-medja storika u jirrifletti żieda qawwija ta’ bejgħ imqabbel max-xhur preċedenti.
Fis-servizzi, il-maġġoranza tan-negozji lokali sostnew li kellhom żieda fl-attività fl-aħħar xhur u din se tkompli tikber, tant li l-aspettattivi tagħhom kienu pożittivi u ferm aħjar mill-medja storika. Dan is-sentiment hu fost l-aqwa fl-Ewropa.
