Malta għandha t-tieni lanqas rata ta’ inflazzjoni fost il-pajjiżi kollha fiż-Żona Ewro. Dan hekk kif f’Settembru ta’ din is-sena, ir-rata ta’ inflazzjoni f’pajjiżna kienet ta’ 7.4%.
Dan skont ċifri ppubblikati mill-Uffiċċju tal-Istatistika tal-Unjoni Ewropea, il-EUROSTAT, li juru kif ir-rata ta’ inflazzjoni ta’ pajjiżna hija 2.5% inqas mill-medja taż-Żona Ewro u saħansitra 3.5% inqas minn dik tal-Unjoni Ewropea.
Intant Iċ-ċifri ppubblikati mill-Uffiċċju Nazzjonali tal-Istatistika, l-NSO juru li r-rata medja għal dawn l-aħħar tnax-il xahar kienet ta’ 4.8%.
Ir-rata ta’ inflazzjoni f’Settembru ta’ din is-sena fiż-Żona Ewro hija ta’ 9.9%, filwaqt li fl-Unjoni Ewropea hija ta’ 10.9%.
IR-RATA TAL-INFLAZZJONI F’SETTEMBRU 2022
MALTA – 7.4%
MEDJA FIŻ-ŻONA EWRO – 9.9%
MEDJA FL-UNJONI EWROPEA 10.9%
Fl-istess żmien is-sena li għaddiet, ir-rata ta’ inflazzjoni fl-Unjoni Ewropea kienet 3.6%. Differenza ta’ 7.3%. Ħarsa lejn iċ-ċifri ta’ pajjiżi minn madwar iż-Żona tal-Ewro u l-Unjoni Ewropea. turi li l-uniku pajjiż fejn l-għoli tal-ħajja hu inqas minn Malta huwa Franza. Hawnhekk ir-rata ta’ inflazzjoni hija ta’ 6.2%. Wara Malta, imbagħad, tiġi l-Finlandja b’rata ta’ inflazzjoni ta’ 8.4%.
IL-PAJJIŻI BL-INQAS RATA T’GĦOLI TAL-ĦAJJA
FRANZA – 6.2%
MALTA – 7.4%
IL-FINLANDJA – 8.4%
F’Settembru, l-ogħla rata ta’ għoli ta’ inflazzjoni fiż-Żona Ewro u l-Unjoni Ewropea kienet l-Estonja, b’aktar minn 24%; differenza ta’ iżjed minn 16% mir-rata tal-għoli tal-ħajja f’Malta.
DIFFERENZA BEJN ESTONJA U MALTA
ESTONJA – 24.1
MALTA – 7.4%
DIFFERENZA – 16.7%
Wara l-Estonja jiġu l-Litwanja u l-Latvja, li lkoll għandhom rata ta’ inflazzjoni li taqbeż l-21%.
IL-PAJJIŻI BL-IŻJED GĦOLI TAL-ĦAJJA
L-ESTONJA 24.1%
IL-LITWANJA 22.5%
IL-LATVJA 22.0%
Minn dawn iċ-ċifri tal-EUROSTAT kompla jiġi kkonfermat kif l-isfidi internazzjonali minħabba l-gwerra fl-Ukrajna ħallew impatt qawwi fuq il-prezzijiet, fosthom dawk tal-enerġija segwiti mill-prezzijiet tal-ikel, ix-xorb alkoħoliku u t-tabakk, f’kull Stat membru tal-Unjoni Ewropea.
Fil-fatt, l-Eurostat qal li l-ikbar fatturi għaż-żieda fir-rata tal-inflazzjoni kienu l-prezzijiet tal-enerġija. Hawnhekk kien hawn żieda ta’ aktar minn 4 punti perċentwali. Isegwu hemm il-prezzijiet tal-ikel, ix-xorb alkoħoliku u t-tabakk bi 2.47 punti perċentwali.
Madankollu minkejja dan fl-aħħar xhur, il-Gvern Malti żamm il-prezzijiet tal-enerġija u tal-fjuwil stabbli.
Apparti li l-Gvern qed jissussidja l-prezzijiet tal-enerġija, il-Gvern qed jgħin ukoll billi jħallas għal ħażna żejda tal-qmuħ u tal-ġwież, kif ukoll ta għajnuna lil dawk li jrabbu l-majjali.
Barra minn hekk, il-Gvern ta €3 miljun lill-bdiewa biex jittaffa l-prezz tal-fertilizzant, li għola wkoll riżultat tal-gwerra fl-Ukrajna.
