Permezz ta’ magna ġdida fid-Dipartiment tal-Uroloġija, fi ħdan l-Isptar Mater Dei, il-pazjenti li jbatu mill-ġebla fil-kliewi issa m’għandhomx għalxiex jagħmlu aktar operazzjoni jew jingħatalhom l-oppju.
Dan tħabbar mid-Deputat Prim Ministru u Ministru għas-Saħħa, Chris Fearne, fejn spjega kif din il-magna, li hi ferm inqas invażiva mill-operazzjoni tradizzjonali, se tagħmel differenza kbira f’ħajjet il-pazjent, li issa jista’ jirċievi l-kura mingħajr il-bżonn ta’ ġranet jew ġimgħat ta’ rkupru wara l-intervent.
“Aktar mat-teknoloġija tavvanza, inkluż fil-qasam tas-saħħa, aktar il-pazjenti tagħna jkunu jistgħu jieħdu servizz li hu modern u mingħajr skariġġ u b’riżultati aħjar. Però biex dan ikun jista’ jsir id-Dipartiment tas-Saħħa, il-Gvern, irid jagħmel l-investiment. Inawgurajna magna ġdida li tkisser il-ġebel fil-kliewi b’fondi Ewropej li se tagħti servizz aħjar lil dawk il-pazjenti, li għandna numru minnhom, li tiżviluppalhom il-ġebla fil-kilwa.”
Chris Fearne – Deputat Prim Ministru
L-ispeċjalist fid-Dipartiment tal-Uroloġija, Dr David Farrugia, spjega kif din il-magna ġdida tgħin lit-tobba jaħdmu b’iżjed preċiżjoni u tippermetti li jsiru proċeduri differenti biha, skont il-bżonn tal-pazjent.
“Issa l-mod ta’ kif taħdem il-magna, it-trattament hu aktar tollerabbli għall-pazjent. Il-maġġoranza tal-pazjenti mhu qed ikollhom bżonn xejn għall-uġigħ, kemm jiġu hawnhekk niċċekkjaw li nistgħu nipproċedu, ipoġġu fuq il-magna jagħmlu siegħa ta’ trattament u jmorru d-dar.”
Dr David Farrugia – Speċjalist fl-Uroloġija
Dr Farrugia spjega wkoll li din il-magna tneħħi l-bżonn li pazjent jiġi mraqqad jew imħeddel permezz tal-oppju, li kienet problema għal numru ta’ pazjenti li ma setgħux jirċievu l-oppju għal raġunijiet mediċi oħrajn.
“Il-vantaġġ hu ovvjament li għandek nies li ma jifilħux għal-oppju jew il-oppju hu riskjuż għalihom. Qabel ma stajniex inkissru l-ġebel, iżda b’din il-magna nistgħu. Apparti minn hekk toffrilna aktar il-possibilità li l-ġebel inkissruh u naqbdu aħjar u l-outcome li nkissru l-ġebla issa hu ogħla.”
Dr David Farrugia – Speċjalist fl-Uroloġija
Minn studji Ewropej, jirriżulta li bejn 5% u 10% tal-popolazzjoni tista’ t’esperjenza ġebla fil-kliewi u, għalkemm ħafna mill-pazjenti ma jkollhomx sintomi mill-bidu, huma mijiet l-operazzjonijiet li jsiru f’pajjiżna biex il-ġebla titkisser.
