“Dan hu gvern li ma żied l-ebda piż fuq il-familji u m’għollejna ebda kontijiet.”
Hekk stqarr il-Prim Ministru Robert Abela fid-diskors tiegħu li stqarr kif filwaqt li hawn min qed iħoss l-għoli tal-ħajja, dan il-Gvern mhux ser ikun insensittiv.
Qal, “Għalhekk quddiem l-isfida tal-għoli tal-ħajja għamilna ħaġa waħda fundamentalment differenti. Aħna ma żidna ebda piż fuq il-familji u m’għollejna ebda kontijiet.”
Dr Abela qabbel mas-sitwazzjoni li kien hawn f’pajjiżna taħt Gvern preċedenti fejn quddiem l-isfidi spiċċaw kellhom iġorru l-prezz in-nies.
Saħansitra l-kontijiet kienu għollewhom darbtejn aktar minn kemm kienu għolew mal-bqija tal-Ewropa.
Min-naħa l-oħra filwaqt li l-prezzijiet tal-elettriku madwar l-Ewropa għolew, dan il-Gvern raħħas il-kontijiet.
Il-Prim Ministru Robert Abela innota wkoll kif sa Diċembru li għadda l-Gvern irnexxielu jnaqqas bin-nofs il-persuni fuq dipendenza soċjali meta mqabbel mal-2013.
Hawnhekk ħabbar li f’Ottubru reġa’ ġie rreġistrat tnaqqis ieħor.
Spjega, “M’għidniex ara kemm avvanzajna u waqafna hemm. Minflok ħdimna aktar u nista’ ngħid illejla li f’Ottubru erġajna rreġistrajna tnaqqis ieħor ta’ persuni fuq id-dipendenza soċjali. Minn 14,000 fl-2013 għal anqas minn 6,400 persuna dan ix-xahar. Dan hu l-inqas ammont li qatt kellu pajjiżna. Eluf ta’ nies li tajnihom aktar dinjità.”
Innota kif għal sena oħra dan il-Gvern ser ikun qed iżid il-pensjonijiet b’€5 fil-ġimgħa filwaqt li għolla l-massimu ta’ dħul taxxabbli biex iż-żieda ma tinqabadx fit-taxxa.
Dan filwaqt li ser tibda riforma biex dawk il-pensjonanti li jibqgħu jaħdmu, id-dħul mill-pensjoni ma jibqax jiġi ntaxxat.
Qal, “Issa l-bieraħ l-Kap tal-Oppożizzjoni qalilna li jekk ikun hu Prim Ministru lill-pensjonanti jagħtihom id-doppju tal-COLA. Mela bħan-negozji, anke l-pensjonanti jagħmlu pass lura jekk int issir Prim Ministru. Għax aħna diġa tajnihom iktar mid-doppju tal-COLA. L-iktar vulnerabbli jieħdu żieda sa €15. Issa bik mela kienu jieħdu €3.50. Kważi ħames darbiet.”
Maż-żieda fil-pensjoni huwa elenka numru ta’ miżuri mill-budget li minnhom ser ikunu qed igawdu minnhom l-anzjani Maltin u Għawdxin fosthom il-mediċina b’xejn għal kull min jaqbeż it-80 sena, iż-żieda ta’ €150 fil-bonus annwali għal persuni li laħqu l-età tal-irtirar iżda li ma jikkwalifikawx għall-pensjoni, u żieda ta’ €1,000 fil-benefiċċju tal-Carer at Home.
Il-Prim Ministru stqarr li dan il-Gvern ser ikompli jinvesti fil-ħiliet tal-ulied Maltin.
Fost l-oħrajn innota kif id-dħul ta’ koppja fuq il-paga minima permezz ta’ dan il-budget ser tiżdied bi kważi €450 filwaqt li għal sena oħra dan il-Gvern ser ikun qed jinvesti wkoll fl-istudenti.
Qal, “Pajjiżi oħrajn qed jgħollu l-ħlas tal-edukazzjoni terzjarja. Jekk nagħmlu bħalhom inkissru l-mobilità soċjali. Aħna minflok ser inżidu l-istipendju lill-istudenti b’10%. U għal dawk l-istudenti li jaħdmu part-time, ser nagħtuhom l-istipendju.”
