Pajjiżna għandu l-inqas rata ta’ inflazzjoni iżda dan mhux biżżejjed biex nieqfu naġixxu quddiem l-isfida tal-għoli tal-ħajja riżultat tal-gwerra fl-Ukrajna.
Dan sostnieh il-Prim Ministru Robert Abela f’indirizz li għamel fil-Parlament it-Tlieta filgħaxija waqt Stqarrija Ministerjali b’rabta ma’ tliet impenji li kellu barra l-pajjiż f’dawn l-aħħar ġimgħat.
Il-Prim Ministru tkellem dwar il-laqgħat li kellu ma’ Mexxejja Ewropej f’żewġ laqgħat tal-Kunsill Ewropew u sostna li trid tkun assigurata s-sostennibiltà tas-sanzjonijiet li imponiet l-Ewropa.
Filwaqt li reġa’ kkundanna l-gwerra, il-Prim Ministru aċċenna li biex nibagħtu messaġġ ma għandux iħallas prezz iċ-ċittadin.
Kien hawn li tkellem fuq l-aspett ekonomiku li saħaq tant fuqu fil-fora Ewropej u saħaq li l-impatti f’Malta huma realtà imma li kieku l-Gvern ma aġixxiex f’setturi tant importanti bħall-enerġija u l-fjuwil, ir-realtà kienet tkun tixbaħ dik ta’ pajjiżi Ewropej oħra.
“U hawn niġi għal dak li qed iħasseb lilna kontinwament u m’hemmx dubju lin-nies ukoll. L-inflazzjoni, jew aħjar l-għoli tal-ħajja. Iva, l-ebda pajjiż ma hu speċjali u ma jintlaqatx mill-effetti li qed iġġib il-gwerra iżda daqstant ieħor irridu nkunu kapaċi li nintervjenu kemm nistgħu. U għalhekk fid-deċiżjonijiet li nieħdu ta’ kuljum inżommu f’moħħna l-impatti u dak li lil Malta jolqotha għaliex hi parti mid-dinja. Il-fatt li għandna l-inqas inflazzjoni fl-Unjoni Ewropea għalija u għal Gvern mhux biżżejjed biex nieqfu naħsbu u naġixxu dwar din l-isfida. Fuq kollox għandna l-inqas inflazzjoni għaliex aġixxejna f’setturi importanti.”
Fil-Parlament, il-Prim Ministru tenna l-pożizzjoni ta’ Malta, li għamilha ċara għal darb’oħra mal-Mexxejja Ewropej, dik ta’ flessibiltà biex noffru spalla bħal ma ġara waqt pandemija.
“Semmejt l-isfidi partikolari ta’ Malta u għedt li pajjiżi bħalna għandhom ikollhom flessibiltà li jintervjenu, inkluż favur sigurtà tal-provvissta tal-gass bi prezzijiet stabbli u biex jibqgħu kompetittivi ekonomikament. F’dan ir-rigward, fil-Kunsill Ewropew sħaqt li d-dixxiplina fiskali hija importanti iżda rridu naddottaw l-istess stil li kellna fil-pandemija. Flessibilità biex inwieżnu u noffru spalla lin-nies.”
B’diskors t’empatija man-nies anki quddiem il-prezzijiet tal-ikel, il-Prim Ministru appella biex il-ħidma f’suq ħieles tkun dik favur tkabbir ekonomiku b’mod ġust.
“In-nies ġustament isaqsu; iż-żidiet fil-prezzijiet tal-ikel huma kollha ġejjin minħabba l-gwerra? Jien nemmen li l-imprenditur u n-negozji Maltin, il-maġġoranza tagħhom huma onesti beżlin u b’tant sagrifiċċji waqt pandemija, baqgħu għaddejjin u qed iħarsu lejn dawn iż-żminijiet li ġejjin b’ottimiżmu għax ir-rota qed iddur. Nappella, li filwaqt li aħna għandna suq ħieles, l-għajnuna li ta l-Gvern biex kulħadd baqa’ għaddej u salvajna n-negozi u l-impjiegi tkun il-bażi li fuqha nkomplu nkabbru l-ekonomija b’mod ġust.”
Il-Prim Ministru għamel referenza wkoll għal-laqgħa li kien mistieden għaliha f’Madrid bejn pajjiżi Ewropej u oħrajn min-naħa l-oħra tal-Atlantiku.
Hawn saħaq favur il-paċi minn Malta, li minkejja ċ-ċokon tagħha, għandha leġittimità kbira għaliex hi newtrali bil-Kostituzzjoni.
Il-Prim Ministru Robert Abela semma wkoll kif fl-aħħar Kunsill Ewropew, il-Mexxejja Ewropej qablu li l-Ukrajna u l-Moldova jingħataw status ta’ kandidati għas-sħubija fl-Unjoni Ewropea taħt ċertu kundizzjonijiet.
Fuq il-pajjiżi tal-Balkani, il-proċess ta’ tkabbir fl-Unjoni Ewropea għandu jingħata spinta fuq kriterji marbuta ma’ riformi.
Hawn Dr Abela nnota kif pajjiżna wkoll għadda minn riformi u fadallu iżjed x’ibiddel.
Bidliet tanġibbli li jfissru wkoll tkattir tal-ġid f’pajjiż modern u serju.
“Tassew ir-riformi mhumiex xi ħaġa faċli iżda, għandna valuri Ewropej li rridu nassiguraw li jiġu mħaddna u dan hu settur fejn qatt ma tkun wasalt. L-ebda pajjiż fid-dinja ma jista’ jgħid li jkun wasal biżżejjed. Aħna nistgħu nitkellmu fuq hekk għaliex f’dawn l-aħħar sentejn ma waqafniex inbiddlu u nsaħħu. L-ewwelnett irid ikollok ir-rieda iżda fuq kollox imbagħad trid taġixxi u timplimenta.”
