Raġel li żmien ilu ma nstabx ħati li stupra lil oħtu 12-il sena ilu, kellu s-sentenza tiegħu ikkonfermata mill-Qorti tal-Appell aktar kmieni llum.
Ir-raġel, li issa għandu 31 sena, kien akkużat li fl-2006 stupra b’mod vjolenti lill-oħtu, li dak iż-żmien kellha biss 12-il sena, li żamma kontra r-rieda tagħha, u li ffastidja lil ħutu bniet ta’ 12 u 17-il sena, rispettivament.
L-akkużat ma nstabtx ħati ta’ dan kollu fl-2013, u l-Avukat Ġenerali appella mis-sentenza għaliex qal li l-ewwel Qorti m’għamlitx stħarriġ xieraq tal-fatti, hekk kif għażlet li ma tagħtix l-importanza xierqa lix-xhieda tal-minuri minħabba inkonsistenzi.
Il-Qorti tal-Appell qalet li f’dawn it-tip ta’ każi huwa normali li l-verżjoni tal-akkużat u dak tal-vittma ma jaqblux ma’ xulxin, u għalhekk, il-Qorti tikkunsidra wkoll xhieda minn esperti mediċi u fiżiċi fost oħrajn.
Jidher li dan il-każ kien ikkaratterizzat minn xhieda inkosistenti, tant, li minn każ ta’ stupru vjolenti spiċċa każ ta’ fastidju. Il-Qorti osservat li ż-żewġt aħwa tfajliet ammettu ma’ social worker u ma’ ommhom stess li esaġeraw dak li qalu fil-Qorti, u qabblu dak li ġara lilhom ma’ rapport li kienu raw fl-aħbarijiet.
Il-Qorti nnutat ukoll li eżamijiet mediċi wrew li ma kien hemm ebda abbuż sesswali jew penetrazzjoni fuq il-minuri. Dan apparti l-fatt li t-terapista tal-allegat vittma qalet li t-tifla marret biss għal tliet sessjonijiet, u ma tat ebda informazzjoni.
Fil-Qorti ħareġ ukoll li l-allegat vittma li daħlet fuq ħuha waqt li kien qed jara materjal pornografiku, u baqgħet issegwi l-filmat miegħu.
Il-Qorti qalet li minħabba evidenza kontradittorja ma setgħetx tiddetermina jekk sarx abbuż sesswali fuq il-minuri jew le. Għalhekk, il-Qorti tal-Appell ikkonfermat is-sentenza tal-ewwel Qorti, li r-raġel mhux ħati tal-akkużi ta’ stupru miġjuba kontrih.
