Ftit tal-mumenti wara li l-Qorti Kriminali sabet lil Jason Azzopardi ħati ta’ disprezz lejn l-istess Qorti, meta ġibed filmati, tal-Prim Ministru Robert Abela u tal-Ministru Jonathan Attard, fil-binja Qorti, b’mod illegali, il-Kap De Facto tal-Partit Nazzjonalista, Karol Aquilina, kien pront ħareġ stqarrija, f’isem il-PN.
Però ONE News jinsab infurmat, minn sorsi ġewwa l-Grupp Parlamentari Nazzjonalista, li Karol Aquilina ħareġ din l-istqarrija, b’appoġġ għal Jason Azzopardi, mingħajr ma informa lid-deputati Nazzjonalisti.
Sors qal li “bħala deputati, aħna ma approvajna ebda stqarrija qabel ħarġet”.
Sors ieħor qal “l-istqarrija, tal-Partit, iffirmata minn Karol, favur Jason, rajtha l-ewwel darba fit-Times of Malta”.
L-istess sors qal lil ONE News “illum kien hemm rabja kbira fil-Grupp Parlamentari, għax din mhix stqarrija kwalunkwe, din stqarrija b’appoġġ għal persuna li xeba jinqabad jigdeb, inkluż mill-Qorti stess. Jason Azzopardi huwa ta’ mażra kbira ma’ għonq il-partit u li Karol jaqbad u joħorg stqarrija ta’ appoġġ għalih mingħajr ma niddiskutuha internament, din mhux aċċettabbli. Bl-istqarrija tiegħu, Karol ried idaħħalna kollha fil-kredu miegħu”.
Sadanittant ma kienx id-Deputat Karol Aquilina biss li ħareġ jiddefendi lil Jason Azzopardi, għaliex ftit wara ħuh, il-President tal-għaqda Repubblika Robert Aquilina u ħaġa waħda ma’ Jason Azzopardi, tella’ żewġ posts fuq Facebook jgħid li minkejja l-isfidi li qed jaffaċċjaw xorta kburi bil-ħidma tagħhom flimkien. Saħansitra Azzopardi stess ikkumentalu u qallu “grazzi ħabib”.
Ta’ min ifakkar ukoll kif Bernard Grech ma wasal qatt biex jiddiżassoċja ruħu minnu, anzi ftit tax-xhur ilu, huwa kien qal li huwa riżorsa importanti għall-pajjiż u anka għall-Partit li suppost qed imexxi.
“Jien naħseb li huwa riżorsa għall-pajjiż. Jason Azzopardi kien deputat u kien Ministru ta’ Gvern Nazzjonalista, kien riżorsa u asset għall-pajjiż u għall-partit u naħseb li għadu riżorsa għall-pajjiż.”
