It-tieni avveniment tal-MAAA wara t-tkomplija tal-kompetizzjonijiet wasslet għal rekord nazzjonali ieħor. Din id-darba kien Luke Farrugia li tejjeb bi kważi żewġ metri l-aqwa distanza qatt reġistrata minn atleta Malti fid-discus throw, b’51.92 metru.
Farrugia huwa kkowċjat mill-atleta-kowċ Antonella Chouhal, u huwa parti minn Rush AC. B’hekk dawn kienu tmint ijiem li mhux se jintesew żgur għal dan il-klabb, wara li fl-ewwel avveniment Luca Martini kiser ir-rekord nazzjonali tal-hammer throw.
Ian Paul Grech (Pembroke Athleta) rebaħ il-100 metru f’ħin ta’ 11.09 sekonda quddiem Jeremy Zammit (Pembroke Athleta – 11.18s) u Warren Zammit (Rush Athletic – 11.30s). Luke Bezzina, rebbieħ fuq din id-distanza l-ġimgħa li għaddiet waqaf muġugħ wara li kellu bidu promettenti għat-tellieqa.
Fil-100 metru tan-nisa, Claire Azzopardi kkonfermat is-supremazija tagħha, b’ħin ta’ 12.09s. It-tieni u t-tielet post raw taqtigħa bil-photofinish fejn Janet Richard għaddiet lil Sarah Busuttil b’12.31 kontra 12.32 sekonda. Fiż-żewġ każijiet, ir-riħ kien ta’ ftit aktar minn +2 m/s, li jfisser ftit aktar mil-limitu approvat.
L-isprints it-twal taw spettaklu mill-aqwa. Fl-400 m tal-irġiel, Graham Pelligrini ta’ Pembroke Athleta, li għadu jappartjeni għall-kategorija U/18, wettaq l-akbar sorpriża tal-ġurnata meta b’ħin ta’ 52.06 sekonda għeleb atleti ta’ esperjenza bħal Matthew Croker (Savio Athletic Club) – 52.20 u Krestien Micallef (Rush AC) – 52.48.
Fil-long jump tal-irġiel, Ian Paul Grech kien 2 ċentimetri biss bogħod minn qabża ta’ 7 mentri, kejl meqjus bħala ambizzjoni tal-aqwa atleti Maltin. Huwa għeleb l-isfida ta’ Jeremy Zammit (6.53m) u Godfrey Sapiano (6.21m).
Għat-tieni ġimgħa konsekuttiva, Claire Azzopardi ta’ Pembroke Athleta rreġistrat doppjetta fil-100 metru u long jump, b’qabża ta’ 5.99 metru, li fissret ukoll l-aqwa riżultat qatt miksub minnha. L-atleta promettenti ta’ taħt it-18-il sena Rachela Pace kellha qabża tajba ta’ 5.50 metru filwaqt li Kimahri Charles temmet fit-tielet post b’4.87 metru.
Il-President tal-MAAA Andy Grech esprima s-sodisfazzjon tiegħu għar-riżutati miksuba u b’mod partikolari għall-prestazzjonijiet mill-aqwa ta’ għadd ta’ atleti żgħażagħ.
