Il-Pulizija qed timxi mat-teżi li Luke Farrugia, magħruf bħala “Tal-Beret”, ta’ sitta u tletin sena li jgħix Birkirkara, bħala l-allegat perċimes fiċ-ċirku ta’ kriminalità organizzata, li involva traffikar ta’ persuni mill-Kolumbja bl-iskop ta’ prostituzzjoni.
Farrugia hu wieħed mid-disa’ persuni li baqgħu jinżammu arrestati fil-Faċilità Korrettiva ta’ Kordin, wara li tressqu l-Qorti t-Tlieta filgħaxija, akkużati, fost oħrajn, bi traffikar uman u ħasil ta’ flus.
Mill-Qorti ħareġ kif l-allegat akkużati kienu qed imexxu burdell fil-Gżira.
Fil-Qorti, il-Prosekuzzjoni mmexxija mill-Ispettur Ramon Bonett Sladden, spjegat kif id-disa’ akkużati allegatament ġabu f’pajjiżna erba’ tfajliet mill-Kolumbja biex jintużaw fil-prostituzzjoni.
Luke Farrugia hu magħruf sew mal-Pulizija, hekk kif diġà kellu każi preċedenti fil-Qorti dwar burdell f’Tas-Sliema. Dakinhar, Farrugia kien tressaq ma’ ċertu Don Spagnol u sitt Kolumbjani, b’rabta maż-żamma ta’ dan l-istess burdell.
Il-persuni l-oħrajn, li tressqu ma’ Farrugia t-Tlieta, ġew akkużati fil-Qorti li kellhom sehem f’burdell ieħor, inkluż billi jieħdu l-appuntamenti għal attivitajiet sesswali, waqt li jwasslu lin-nisa fil-postijiet indikati mill-klijenti, hekk kif uħud minnhom jaħdmu wkoll bħala xufiera tat-taxis.
Fost l-akkużati, hemm minnhom li wkoll huma riċedivi u anke kisru kundizzjonijiet ta’ ħelsien mill-arrest jew sentenzi sospiżi.
Il-Prosekuzzjoni spjegat li dawn id-disa’ persuni ġew arrestati, fost ħdax-il persuna f’operazzjoni, li involviet bosta taqsimiet tal-Korp tal-Pulizija, it-Tnejn għall-ħabta tas-sitta ta’ filgħodu. Huma ġew arrestati fil-lokalitajiet ta’ Birkirkara, il-Gżira, San Pawl il-Baħar, is-Siġġiewi, il-Fgura, il-Gudja, Raħal Ġdid, Ħaż-Żebbuġ u l-Isla.
Fil-Qorti, il-Prosekuzzjoni sostniet li, waqt li saru aktar investigazzjonijiet wara li ġew arrestati, sar magħruf li hemm allegat burdell ieħor b’erba’ tfajliet oħra.
Intqal li t-Tlieta, f’Malta, waslet tfajla oħra għal skop ta’ allegat prostituzzjoni u allegatament xi ħadd mill-akkużati kellu jmur għal din it-tfajla. Ġie spjegat ukoll li l-ġimgħa d-dieħla aktarx mistennija jaslu aktar tfajliet fiż-żamma ta’ dan l-allegat burdell.
Il-Prosekuzzjoni spjegat fil-Qorti wkoll li għandha biżżejjed evidenza li qraba tan-nisa fil-Kolombja jinsabu mbeżża’, hekk kif allegatament ġew ikkuntattjati jew mhedda mill-akkużati. Intqal li dwar dan se toħroġ aktar xhieda fl-istadju tal-kumpilazzjoni tal-evidenza.
Bil-Prosekuzzjoni tgħid li l-investigazzjonijiet bdew xahrejn ilu, proprju fit-tlettax ta’ Ġunju li għadda. Iżda wara ħafna investigazzjonijiet intensivi, il-Pulizija waslet għal dawn id-disa’ persuni.
It-Tlieta filgħaxija, quddiem il-Maġistrat Claire Stafrace Zammit, id-disa’ akkużati kollha kemm huma wieġbu li mhumiex ħatja għall-akkużi miġjuba kontrihom, waqt li talbu għall-ħelsien mill-arrest.
Minkejja dan, din it-talba ma ġietx milqugħa mill-Qorti.
Ritratt: Times of Malta
