L-intriċċi fil-Partit Nazzjonalista qed jiżdiedu min jum għal jum.
Fl-aħħar sigħat komplew jintensifikaw u fil-jum tal-Erbgħa ħadu s-sura tagħhom meta l-membri tal-Kunsill Ġenerali, l-ogħla organu tal-Partit Nazzjonalista kienu qed jivvutaw fil-votazzjoni bikrija.
Fil-jum tal-Erbgħa vvutaw erba’ mija u erbgħa u tmenin kunsillier mill-elf, sitt mija u tletin kunsillier li hemm eliġibbli biex jagħżlu jekk it-tesserati jikkonfermawx lil Adrian Delia bħala Kap jew issirx tellieqa għall-elezzjoni ta’ Kap tal-Partit Nazzjonalista.
Il-votazzjoni se tkompli l-Ġimgħa filgħaxija u fil-jum tas-Sibt.
Intant kunsilliera Nazzjonalisti li tkellmu magħna bil-kundizzjoni li ma nesponuhomx jew niżvelaw imqar xi ħaġa dwarhom qalu lil ONE News li esponenti mill-fazzjoni ta’ Simon Busuttil kienu qed iħeġġu lill-kunsilliera biex jivvutaw favur elezzjoni għal Kap.
Fi kliemhom ma felħux aktar għall-intriċċi li qed isiru u semmew fost oħrajn l-eks Segretarju Ġenerali u l-eks Ministru Nazzjonalista Louis Galea.
Is-sorsi tagħna qalulna li Louis Galea qed saħansitra jċempel u jara kif se jikkonvinċi lit-tesserati biex tgħaddi tal-fazzjoni ta’ Simon Busuttil.
Fl-aħħar jiem, dak li tqabbad biex jagħmel is-suppost tiġdid u bidliet fl-istatut tal-partit tal-maduma qal li Delia ma jistax jibqa’ Kap u akkużah li qed jabbuża mil-lealtà tat-tesserati.
Intant dik li hija mifhuma li hija waħda mill-kunsilliera Nazzjonalisti ppubblikat messaġġ li bagħtet lill-eks deputata Paula Mifsud Bonnici li jidher li dejqitha bil-messaġġi tagħha.
Dan kollu qed jiġri fl-isfond li Arrigo semma ħtif ta’ informazzjoni filwaqt li d-deputati ribelli u li sfiduċjaw lil Delia ċaħdu li nkisret xi protezzjoni tal-informazzjoni.
Intant fil-messaġġ lil Paula Mifsud Bonnici ssemma wkoll l-eks deputat Richard Muscat.
Nhar it-Tlieta fuq l-Independent u t-Times, Richard Muscat u Paula Mifsud Bonnici kitbu favur li t-tesserati jagħżlu kap ġdid.
Fl-artikli identitiċi, huma attakkaw bla rażan lil Delia u qalu li jeħtieġ isir xi ħaġa biex isalvaw il-partit mill-istat diżastruż li jinsab fih.
Semmew it-telfiet elettorali tal-Parlament Ewropew u tal-Kunsilli Lokali li ġraw taħt it-tmexxija ta’ Delia u qalu li l-kitba hija fuq il-ħajt.
Intant filwaqt li d-deputati ribelli ħarġu stqarrija oħra bi kliem forma ta’ kampanja elettorali fejn komplew jimbuttaw għall-elezzjoni ta’ Kap fejn ikunu jistgħu jitfgħu ż-żwiemel tagħhom u jtajru ras Delia, dawk imsejħa bħala l-vuċi tat-tesserati daqqew il-qanpiena tal-fazzjoni Delia.
L-istqarrija mibgħuta mill-membru tal-eżekuttiv favur Delia, André Grech appellat lill-Kunsillieri tal-Kunsill Ġenerali tal-Partit Nazzjonalista biex jagħżlu li jibqgħu jsaħħu l-partit bid-direzzjoni ċara ta’ Adrian Delia.
L-istqarrija tal-fazzjoni Delia ma naqsitx li żżerżaq botta u attakk fin lil fazzjoni l-oħra li sfiduċjat lil Kap.
Fil-fatt din temmet tgħid li t-tesserati jistgħu biss jimmaġinaw kemm il-ħidma ta’ Adrian Delia kienet tkun ikbar u iktar b’saħħitha bid-determinazzjoni tiegħu, li kieku flok iwaqqfuh dawk li qegħdin ikunu appuntamenti annwali għar-rikonferma tiegħu, minflok ikunu appuntamenti li jkunu t’għaqda wara t-tmexxija.
