Ajruplan tal-Forzi Armati ta’ Malta sarlu restawr estensiv wara madwar 24 sena jintuża mill-piloti Maltin.
Il-BN2T Turbine Islander jintuża primarjament sabiex jissorvelja l-ibħra Maltin b’rabta ma’ infurzar tas-sajd u tiftix, fost affarijiet oħra.
ONE News żar il-hanger tal-Forzi Armati ta’ Malta li fih jinżamm dan l-ajruplan li l-Ħadd li għadda wasal mill-Ingilterra wara li tlestielu restawr u xogħol estensiv li ħa madwar 10 xhur.
Hekk kif segwejna mill-qrib dan l-ajruplan, li huwa l-eqdem inġenju tal-ajru li jifforma parti mill-flotta tal-ajruplan tal-Forzi Armati u li għadu jtir, tkellimna mal-Kaptan Maverick Scerri li huwa wkoll uffiċjal tekniku.
Huwa spjegalna għaliex sarlu dan il-proċess ta’ riġenerazzjoni.
Qal, “Ilu minn żmien antik b’ċertu equipment li kellu li, għalkemm forsi kien jaħdem, kien qed jinħass li jsiru ċertI upgrades biex inti tkun tista’ topera dejjem aħjar.”
Il-Kaptan Scerri spjega li, fil-faċilità li fih twieled dan l-ajruplan, dik ta’ Britten-Norman, saru tliet affarijiet prinċipali tul dawn il-proċess ta’ restawr u titjib.
Fost oħrajn, fil-fatt, saritlu spezzjoni u tibdil fl-istrutturi ta’ barra minħabba li biż-żmien il-materjal tal-ajruplan beda jiddeterjora, anke minħabba l-elementi ta’ gżiritna u peress li fuqu jinġema’ l-melħ tal-baħar. Barra minn hekk, ingħata dehra ġdida minn barra li wkoll saret b’żebgħa apposta biex jiġi protett il-ħadid ta’ barra.
Stqarr, “Fl-aħħar ukoll saritlu wkoll upgrade fil-cockpit. Għandu dik li jgħidula glass cockpit. Il-glass cockpit hija dik fejn l-electronics tiegħu ġew upgraded għaż-żmien tal-lum. Għandu equipment tal-Garmin li dawn jgħinu lill-pilots joperaw b’mod iktar effettiv u jżidulhom l-effiċjenza tagħhom u jkun jista’ jikkontrolla l-ajruplan sew b’mod iktar sempliċi.”
Il-Kaptan Scerri spjegalna wkoll li issa li dan l-ajruplan jinsab lura fi gżiritna u huwa lest biex jirritorna lura għall-ħidma, qed isir it-taħriġ neċessarju lill-bdoti sabiex jiġu mgħarrfa u mgħallmin jużaw l-affarijiet ġodda li jinkludi l-ajruplan b’riżultat tar-riġenerazzjoni li saritlu. Iżda mhux biss.
Qal, “Mis-sena l-oħra, meta bdejna l-upgrade, bdejna wkoll inħarrġu t-technicians tagħna biex ikunu aktar familjari, speċjalment dwar l-equipment il-ġdid. Allura jridu, ovvjament għamlu l-kors neċessarju biex ikunu jistgħu jaħdmu fuqu biex l-ajruplan ikun jista’ jinżamm itir.
